АҚШ ва Россия туннель орқали боғланиши мумкин

Россия ва АҚШни Чукотка ва Аляскани Беринг бўғози орқали боғлайдиган туннель қуриш лойиҳасини муҳокама қилиш бошланди. Бу ҳақда Россия Президенти Владимир Путиннинг хорижий давлатлар билан иқтисодий ҳамкорлик бўйича махсус вакили ва Россия тўғридан тўғри инвестициялар жамғармаси раҳбари Кирилл Дмитриев Х ижтимоий тармоғидаги саҳифасида маълум қилди.

“Россия ва АҚШ ўртасидаги туннель бўйича муҳокамалар бошланмоқда”, деб ёзди у.

Дмитриевнинг сўзларига кўра, лойиҳа икки давлат ўртасидаги “бирлик рамзи” бўлиши мумкин. АҚШ Президенти Дональд Трамп эса бу ғояни қизиқарли деб атаб, “бу ҳақда ўйлаб кўрмоқчи” эканини айтган.

“Мен яқинда Россиядан Аляскагача туннель ғояси ҳақида эшитдим. Бунгача бундай нарса ҳақида билмаганман. Биз яқинда Аляскада ажойиб йўл қурдик. У бизга кўплаб фойдали қазилмалар манбаларига бориш имконини беради”, дейди Трамп.

Кеча, 17 октябрь куни Дмитриев Илон Маскни Беринг бўғози остидан “Путин–Трамп” деб номланиши режалаштирилган туннель қурилишида иштирок этишга таклиф қилган. Шунингдек, у Boring Company асосчисига X орқали мурожаат қилиб, Россия ва АҚШ кучларини бирлаштиришга чақирган.

“Қўшма Штатлар ва Россияни, Американи ва Афроевросиёни боғловчи туннелни тасаввур қилинг – Путин-Трамп туннели, 70 миль узунликдаги ҳалқа, бирлик рамзи. Келинг, келажакни биргаликда қура оламиз! Инсоният тарихида биринчи марта қитъаларни боғлаш вақти келди”, деб ёзган у.

Дмитриевнинг ҳисоб-китобларига кўра, лойиҳа қиймати тахминан 65 миллиард долларни ташкил этади, бироқ Boring Company технологияларидан фойдаланилса, харажатлар деярли саккиз баравар арзонлашиб, 8 миллиард доллардан ҳам кам бўлиши мумкин. У, шунингдек, туннелни саккиз йил ичида қуриб битириш мумкинлигига ишонч билдирган.

Россия тўғридан тўғри инвестициялар жамғармаси раҳбари жамғарма лойиҳани молиялаштиришда иштирок этишга тайёрлигини маълум қилган. Унга кўра, “Россия ва АҚШни Беринг бўғози орқали боғлаш орзуси” қадимдан мавжуд бўлиб, жамғарма АҚШ-Канада-Россия-Хитой темирйўл йўналиши каби турли вариантларни ўрганиб чиққан ва энг истиқболли вариантни қўллаб-қувватлашга тайёр.

Маълумот учун, Кирилл Дмитриев 2025 йил февраль ойида Владимир Путиннинг хорижий давлатлар билан инвестицион-иқтисодий ҳамкорлик бўйича махсус вакили этиб тайинланган. Август ойида у Путиннинг Аляскага қилган ташрифи чоғида Россия делегацияси таркибида бўлган.