АҚШ ва Россия кўп млрд долларлик нефть битимини муҳокама қилмоқда – ОАВ

АҚШ ва Россия “Лукойл” компанияси активлари иштирокида кўп миллиард долларлик нефть битимини муҳокама қилмоқда. Бу ҳақда “The New York Times” хабар берди.

“Москва ва Вашингтоннинг Украина бўйича музокаралари кенгайди ва эндиликда кўп миллиард долларлик нефть битимини ҳам ўз ичига олмоқда”, деб ёзади нашр. 

Музокаралар бориши билан таниш бўлган нашр манбаларининг маълумотларига кўра, гап “Лукойл”га тегишли бўлган нефть конлари, нефтни қайта ишлаш заводлари ва ёнилғи қуйиш шохобчалари, жумладан, АҚШдаги АЁҚШлар, Шарқий Европадаги НҚИЗ ва бошқа минтақалардаги конлар ҳақида бормоқда.

Қайд этилишича, АҚШ эҳтимолий битимни Украинадаги ҳарбий ҳаракатлар тугашидан олдинроқ тузишни таклиф қилган. АҚШ ушбу битимда Халқаро молиявий ривожланиш корпорацияси орқали иштирок этмоқда, шунингдек, америкалик молиячи Тодд Боули, Қатар ва Амирликлар тадбиркорлари ҳам иштирокчи сифатида тилга олинмоқда.

Битим ҳақидаги масала сентябрь ойида Россия Президенти Владимир Путиннинг АҚШ Президенти Дональд Трампнинг махсус вакиллари Стив Уиткофф ва Жаред Кушнер билан учрашувида кўтарилган.

Маълумот учун, “Лукойл” – дунёдаги энг йирик интеграциялашган нефть-газ компанияларидан биридир. Унинг ҳиссасига жаҳон нефть қазиб олиш ҳажмининг 2 фоиздан ортиғи ва углеводород захираларининг қарийб 1 фоизи тўғри келади.