АҚШ USAID'ни ёпишни расман эълон қилди

АҚШ Давлат департаменти АҚШ Халқаро тараққиёт агентлиги (USAID) тарқатиб юборилишини расман маълум қилди. Бу ҳақда “Reuters” хабар берди.

Қайд этилишича, USAID'ни қайта ташкил этиш 1 июлга қадар амалга оширилади. Унинг функцияларининг бир қисмини Давлат департаменти ўз зиммасига олади.

“Тўғри кўрсатилган хорижий ёрдам миллий манфаатларимизни илгари суриши, чегараларимизни ҳимоя қилиши ва асосий иттифоқчилар билан ҳамкорлик алоқаларини мустаҳкамлаши мумкин. Афсуски, USAID ўзининг дастлабки миссиясидан аллақачон четга чиққан. Натижада ютуқлар жуда кичик, харажатлар эса жуда юқори бўлиб чиқди”, дейилади хабарда.

“Reuters“ маълумотларига кўра, Ҳукумат самарадорлиги департаменти (DOGE) USAID ходимларига қонунда кўзда тутилмаган барча лавозимлар тугатилишини маълум қилган. Тез орада агентликнинг барча ходимлари июль-сентябрь ойларида ишдан бўшаш таклифи билан хат олади.

DOGE баёнотида айтилишича, Давлат департаменти бу даврда USAIDʼнинг қолган ҳаётий ва стратегик ёрдам дастурларини ўз зиммасига олади. Шу билан бирга, USAID ходимлари автоматик равишда Давлат департаментига ўтказилмайди.

Эслатиб ўтамиз, аввалроқ АҚШнинг Мэриленд штати федерал судьяси Теодор Чуанг иш материалларини кўриб чиққач, АҚШ Халқаро тараққиёт агентлиги (USAID) фаолиятининг тўхтатилиши ноқонуний экани ҳақида хулоса чиқарганди ва агентликнинг ишини тиклаш бўйича қарор қабул қилганди. Олдинроқ эса Давлат котиби Марко Рубио USAID дастурларининг 80 фоиздан ортиғи ёпилишини эълон қилган эди. Давлат котибининг сўзларига кўра, USAIDʼни бекор қилиш учун Америка Қўшма Штатлари томонидан 5 минг 200 дан ортиқ шартнома тузилган. Шунингдек, Давлат котиби “узоқ вақтдан бери кечикиб кетган тарихий ислоҳот”га қўшган ҳиссаси учун Илон Маск томонидан назорат қилинадиган Ҳукумат самарадорлиги идорасига миннатдорлик билдирган.