АҚШ Украинага Patriot ракеталарини ишлаб чиқаришга ҳали рухсат бермаган – Трамп

АҚШ Президенти Дональд Трамп мамлакат ҳали Украинага Patriot ракета тизимлари учун ракеталарни ишлаб чиқариш лицензиясини беришга розилик бермаганини, аммо бу борада музокаралар давом этаётганини айтди. Бу ҳақда у кеча, 31 июль куни Кэмп-Дэвидда ўтказилган ҳукумат йиғилишида сўз очди.

Трампнинг айтишича, АҚШ замонавий ракета технологияларини бошқа давлатга беришда жуда эҳтиёткор бўлиши керак. 

Ҳукумат йиғилишида журналистларнинг саволларига жавоб берган Трамп Украина Президенти Владимир Зеленский Patriot тизимлари ҳамда Tomahawk ракеталарини олишни хоҳлаётганини айтган.

“Бу жуда катта қадам. Президент Зеленский Patriot тизимларини, шунингдек Tomahawk ракеталарини ҳам хоҳлаяпти. Улардан бири ҳужумкор, иккинчиси мудофаа қуроли. Бундай технологияларни беришда жуда эҳтиёткор бўлиш керак. Биз ҳали бунга розилик бермадик. Бу ҳақда музокара қиляпмиз, аммо бундай технологияни бериш осон қарор эмас. Менимча, бу ҳеч қачон содир бўлмайди, лекин баъзан технология берган одамлар кейинчалик уни сизга қарши ҳам ишлатиши мумкин”, деган Трамп.

Трамп шу ой Туркияда Зеленский билан учрашувида Украинага Patriot ракета тутқичларини маҳаллий ишлаб чиқариш учун лицензия бериш нияти борлигини айтган эди. Бироқ кейинчалик у бу ваъдасидан чекинган. Бу ҳафта Зеленскийни Оқ уйда қабул қилганига қарамай, лицензия масаласи бўйича аниқ қарор қабул қилинмаган.

Россиянинг ҳаво ҳужумлари кучайгани сабабли Украина Patriot тизимлари учун ракеталар танқислигига дуч келмоқда. Patriot ҳозирча Украина ихтиёридаги баллистик ракеталарни йўқ қила оладиган ягона тизим ҳисобланади.

Киев узоқ вақтдан бери баллистик ракеталарга қарши қўлланиладиган Patriot PAC-3 ракеталарини мамлакат ичида ишлаб чиқариш бўйича қўшма лойиҳа ташкил этишга интилиб келмоқда. 

Трампнинг лицензия бериш ҳақидаги мазкур баёноти кўпчилик учун кутилмаган янгилик бўлган. Украинанинг АҚШдаги элчиси Ольга Стефанишина эса 30 июль куни PAC-3 ракеталарини ишлаб чиқарувчи Lockheed Martin компанияси Украина билан ҳамкорликни чуқурлаштиришга тўлиқ содиқ эканига ишонч билдирган. Унинг сўзларига кўра, компания раҳбарлари шу ҳафта Зеленский билан учрашган ва яқин вақт ичида Украинага яна бир делегация юборишни режалаштирмоқда.

Эслатиб ўтамиз, аввалроқ Россиянинг баллистик ракеталар билан амалга оширган ҳужумлари оқибатида Украина бўйлаб камида 7 киши ҳалок бўлuганди.