Украинага Patriot ракеталари учун лицензия берилади – Трамп 

АҚШ Украинага Patriot ҳаво мудофаа тизими учун тутиб қолувчи ракеталарни ишлаб чиқариш лицензиясини бериши мумкин. Бу ҳақда АҚШ Президенти Дональд Трамп НАТОнинг Анқарадаги саммити доирасида Украина Президенти Владимир Зеленский билан учрашувда маълум қилди.

Бу Киев учун катта ютуқ бўлиб, Украина узоқ вақтдан бери мазкур мудофаа қуролларини маҳаллий ишлаб чиқаришга рухсат сўраб келаётган эди.

“Биз сизларга Patriot’ларни ишлаб чиқариш учун лицензия берамиз. Бу жуда яхши. Энди сизлар бизни етарлича бермаяпсиз, деб шикоят қила олмайсизлар. Бу ҳужум қуролидан кўра менга кўпроқ ёқадиган мудофаа қуроли.”, деган Трамп саммит доирасидаги Украина раҳбари билан учрашувда

Трамп лицензиянинг аниқ шартлари ҳақида маълумот бермаган. Бироқ учрашув оҳанги унинг аввал Зеленскийни “миннатдор эмас” деб танқид қилган чиқишларидан кескин фарқ қилган.

Кеча, 8 июль куни учрашувда Трамп икки раҳбар ўртасида “жуда яхши” муносабатлар шаклланганини айтган ҳамда Москва ва Киевнинг ҳар иккиси ҳам 2022 йил февралда Россия босқини билан бошланган урушни якунлашни истаётганини билдирган. Шунингдек, у Россия Президенти Владимир Путин билан ҳам мулоқот қилишини маълум қилган.

“Биз кўплаб урушларни тўхтатдик. Мен буни энг осони бўлади, деб ўйлаган эдим. Аммо Путин ҳам қийин инсон, бу йигит ҳам қийин инсон”, деган Трамп Зеленскийга ишора қилиб.

Зеленский эса АҚШ раҳбари бу урушни тўхтатишига ишонч билдирган.

“Бу урушни тўхтатиш учун қўлингиздан келган барча ишни қилишингизга ишонаман”, деган Зеленский Трампга.

Яқин муддатда Киевга тайёр тутиб қолувчи ракеталар етказиб бериладими-йўқми, бу ҳозирча аниқ эмас. Манбаларнинг таъкидлашича, янги Patriot ракеталари эҳтимол Германия ёки Европанинг бошқа давлатларида ишлаб чиқарилади. Бу уларни Украина ҳудудида ишлаб чиқариш ҳолатида Россия зарбаларининг нишонига айлантирмаслик мақсадида режалаштирилган.

“Агар Украинага Patriot ишлаб чиқариш лицензияси берилса, бу жуда катта воқеа бўлади. Бироқ Украинага ҳаво мудофаа ракеталари ҳозир керак, келажакдаги ишлаб чиқаришни кутиб тура олмайди”, деб ёзган АҚШнинг Россиядаги собиқ элчиси Майкл Макфол X ижтимоий тармоғида.

Трампдан АҚШ зудлик билан қўшимча Patriot ракеталарини юборадими, деб сўралганда, у “айримлари” дарҳол юборилиши мумкинлигини айтган ҳамда Украина ўз ишлаб чиқаришини ҳам тезда бошлай олишига ишонишини билдирган.

“Бизда Patriot’лар бор, аммо улар жуда кўп эмас. Улар ўзимизга ҳам керак. Менимча, Украина уларни анча тез ишлаб чиқара олади. Биз технологияни тушунтирганимиздан кейин компанияни бу ерга олиб келамиз. Сизлар компания билан ишлайсизлар. Улар мураккаб қуролларни ишлаб чиқариш бўйича катта салоҳиятга эга”, деган Трамп.

Зеленский бир неча бор АҚШда ишлаб чиқарилган Patriot ракеталарини сўраб келган. Бу Россия ихтиёридаги баллистик ракеталарни йўқ қила оладиган ягона тизим ҳисобланади. Бундай нишонларнинг юқори тезлиги ва тик парвоз траекторияси уларни тўхтатишни жуда қийинлаштиради.

Трамп, шунингдек, компанияларга Patriot ракеталарини кўпроқ ишлаб чиқариш бўйича босим ўтказилиши мумкинлигини билдирган.

Маълумот учун, Patriot тизимида қўлланиладиган тутиб қолувчи ракеталарнинг асосий пудратчиси Lockheed Martin, тизимнинг ўзи эса 1980-йилларда Raytheon томонидан ишлаб чиқилган. Ҳар икки компания Европа ракета ишлаб чиқарувчиси MBDA билан ҳамкорлик қилади.

Украинанинг Вашингтондаги элчиси Ольга Стефанишина Анқарадаги учрашув АҚШ ва Украина ўртасидаги ҳамкорлик бўйича “бир нечта муҳим стратегик сигналлар” берганини айтган ҳамда бу сигналлар аниқ қарорларга айланишидан умид билдирган.

“Биз АҚШнинг адолатли ва узоқ муддатли тинчликка эришиш йўлидаги доимий иштирокини юқори баҳолаймиз”, деган у.

АҚШ Конгресси аъзолари ҳам бу қарорни олқишлаган.

“Бу ажойиб қарор. Ҳозирги ишлаб чиқариш эҳтиёжни қопламаяпти ва бу албатта ёрдам беради”, деб ёзган Небраскадан республикачи конгрессмен Дон Бейкон X тармоғида.

Эслатиб ўтамиз, аввалроқ Зеленский билан учрашув давомида АҚШ Президентидан Украинага бориш масаласида берилган саволга ижобий жавоб берганди.