Бизга ракета керак! – Украинанинг АҚШдаги элчиси

Украина Россия билан янги ўт очишни тўхтатиш музокаралари 5 йилдан буён давом этаётган урушни қиш киришидан олдин тўхтатишига умид қилмоқда. Бироқ мамлакат Россиянинг ҳужумларидан ҳимояланиш учун ҳозироқ баллистик ракеталарга қарши янги ракеталарга муҳтож. Бу ҳақда Украинанинг АҚШдаги элчиси Ольга Стефанишина маълум қилди.

Стефанишинанинг айтишича, Киев Пентагон билан Patriot PAC-3 ракеталарини Украинада лицензия асосида ишлаб чиқариш бўйича музокаралар олиб бормоқда. Бироқ бу жараён 12 ойдан 5 йилгача вақт олиши мумкин. Шунингдек, Украина PAC-3 ракеталарини узоқ муддатли шартнома асосида харид қилиш ва ишлаб чиқариш навбатида бошқа харидор билан ўрин алмашиш имкониятини ҳам муҳокама қилмоқда.

Элчи Christian Science Monitor томонидан ташкил этилган тадбирда Patriot тизими ишлаб чиқарувчиси Raytheon компанияси вакиллари аллақачон Украинага борганини, PAC-3 тутувчи ракеталарини ишлаб чиқарувчи Lockheed Martin эса мамлакатга мутахассислар гуруҳини юбориш устида иш олиб бораётганини айтган.

“Ҳар кеча содир бўлаётган ҳужумларнинг вайронкор таъсири тасаввур қилиб бўлмайдиган даражада. Кеча ҳам, ундан олдинги кеча ҳам 30–40 та баллистик ракета учирилди”, деган Стефанишина.

Унинг таъкидлашича, Украина Эрон ва Россияда ишлаб чиқарилган дронларга қарши самарали ҳимоялана олмоқда, аммо баллистик ракеталарга қарши ҳали етарли ҳимоя воситасига эга эмас. Айни пайтда Россия Президенти Владимир Путин бундай ракеталар ишлаб чиқаришни тез суръатларда оширмоқда.

“У Украинани йўқ қилиш ниятида. Шунинг учун биз турли имкониятларни излаяпмиз. Кўп соҳаларда муваффақиятга эришдик, аммо бу қиш учун бизга айнан ракета керак”, деган у.

Украина Президенти Владимир Зеленский 28 июль куни Оқ уйда АҚШ Президенти Дональд Трамп билан учрашиб, Россия ҳужумлари кучайиб бораётган бир пайтда янги ҳаво ҳужумидан мудофаа тизимларини ажратиш ҳамда урушни тугатишга қаратилган янги дипломатик саъй-ҳаракатларни бошлаш масаласини муҳокама қилди.

Стефанишинанинг сўзларига кўра, бу жараён АҚШ музокарачилари Стив Уиткофф ва Жаред Кушнернинг Киевга эҳтимолий ташрифини ҳам ўз ичига олиши мумкин. Уларнинг ташрифи санаси ҳали белгиланмаган бўлса-да, у келаси ҳафта ёки ундан кейин амалга ошиши мумкин.

Элчи Зеленский жангларни ҳозирги фронт чизиғида тўхтатиш ва шу асосда музокараларни бошлаш таклифини яна бир бор илгари сурганини билдирган. Шу билан бирга, қиш мавсуми яқинлашаётгани сабабли тезкор чоралар кўриш зарурлигини таъкидлаган.

Стефанишина, шунингдек, Украина ОАВсида тарқалган, ўз лавозимини тарк этиш ҳақида ариза ёзгани тўғрисидаги хабарларни тасдиқлаган. Унинг айтишича, бир йил аввал АҚШдаги элчи лавозимига тайинланганидан кейин шахсий мол-мулк декларацияларига оид коррупция айбловлари юзасидан ўзини ҳимоя қилиш учун Украинага қайтишга қарор қилган.

Унинг сўзларига кўра, Зеленский ундан истеъфога чиқишни талаб қилмаган ва лавозимини тарк этишини истамаган. Бироқ элчи ўзи ва оиласи учун “ишимни шахсан ҳимоя қилиш энг тўғри қарор” деб ҳисоблашини айтган.

Эслатиб ўтамиз, аввалроқ АҚШ Президенти Дональд Трамп НАТОнинг Анқарадаги саммити доирасида Украина Президенти Владимир Зеленский билан учрашувда АҚШ Украинага Patriot ҳаво мудофаа тизими учун тутиб қолувчи ракеталарни ишлаб чиқариш лицензиясини бериши мумкинлигини билдирганди.