Bizga raketa kerak! – Ukrainaning AQSHdagi elchisi

Ukraina Rossiya bilan yangi o‘t ochishni to‘xtatish muzokaralari 5 yildan buyon davom etayotgan urushni qish kirishidan oldin to‘xtatishiga umid qilmoqda. Biroq mamlakat Rossiyaning hujumlaridan himoyalanish uchun hoziroq ballistik raketalarga qarshi yangi raketalarga muhtoj. Bu haqda Ukrainaning AQSHdagi elchisi Olga Stefanishina ma’lum qildi.

Stefanishinaning aytishicha, Kiyev Pentagon bilan Patriot PAC-3 raketalarini Ukrainada litsenziya asosida ishlab chiqarish bo‘yicha muzokaralar olib bormoqda. Biroq bu jarayon 12 oydan 5 yilgacha vaqt olishi mumkin. Shuningdek, Ukraina PAC-3 raketalarini uzoq muddatli shartnoma asosida xarid qilish va ishlab chiqarish navbatida boshqa xaridor bilan o‘rin almashish imkoniyatini ham muhokama qilmoqda.

Elchi Christian Science Monitor tomonidan tashkil etilgan tadbirda Patriot tizimi ishlab chiqaruvchisi Raytheon kompaniyasi vakillari allaqachon Ukrainaga borganini, PAC-3 tutuvchi raketalarini ishlab chiqaruvchi Lockheed Martin esa mamlakatga mutaxassislar guruhini yuborish ustida ish olib borayotganini aytgan.

“Har kecha sodir bo‘layotgan hujumlarning vayronkor ta’siri tasavvur qilib bo‘lmaydigan darajada. Kecha ham, undan oldingi kecha ham 30–40 ta ballistik raketa uchirildi”, degan Stefanishina.

Uning ta’kidlashicha, Ukraina Eron va Rossiyada ishlab chiqarilgan dronlarga qarshi samarali himoyalana olmoqda, ammo ballistik raketalarga qarshi hali yetarli himoya vositasiga ega emas. Ayni paytda Rossiya Prezidenti Vladimir Putin bunday raketalar ishlab chiqarishni tez sur’atlarda oshirmoqda.

“U Ukrainani yo‘q qilish niyatida. Shuning uchun biz turli imkoniyatlarni izlayapmiz. Ko‘p sohalarda muvaffaqiyatga erishdik, ammo bu qish uchun bizga aynan raketa kerak”, degan u.

Ukraina Prezidenti Vladimir Zelenskiy 28 iyul kuni Oq uyda AQSH Prezidenti Donald Tramp bilan uchrashib, Rossiya hujumlari kuchayib borayotgan bir paytda yangi havo hujumidan mudofaa tizimlarini ajratish hamda urushni tugatishga qaratilgan yangi diplomatik sa’y-harakatlarni boshlash masalasini muhokama qildi.

Stefanishinaning so‘zlariga ko‘ra, bu jarayon AQSH muzokarachilari Stiv Uitkoff va Jared Kushnerning Kiyevga ehtimoliy tashrifini ham o‘z ichiga olishi mumkin. Ularning tashrifi sanasi hali belgilanmagan bo‘lsa-da, u kelasi hafta yoki undan keyin amalga oshishi mumkin.

Elchi Zelenskiy janglarni hozirgi front chizig‘ida to‘xtatish va shu asosda muzokaralarni boshlash taklifini yana bir bor ilgari surganini bildirgan. Shu bilan birga, qish mavsumi yaqinlashayotgani sababli tezkor choralar ko‘rish zarurligini ta’kidlagan.

Stefanishina, shuningdek, Ukraina OAVsida tarqalgan, o‘z lavozimini tark etish haqida ariza yozgani to‘g‘risidagi xabarlarni tasdiqlagan. Uning aytishicha, bir yil avval AQSHdagi elchi lavozimiga tayinlanganidan keyin shaxsiy mol-mulk deklaratsiyalariga oid korrupsiya ayblovlari yuzasidan o‘zini himoya qilish uchun Ukrainaga qaytishga qaror qilgan.

Uning so‘zlariga ko‘ra, Zelenskiy undan iste’foga chiqishni talab qilmagan va lavozimini tark etishini istamagan. Biroq elchi o‘zi va oilasi uchun “ishimni shaxsan himoya qilish eng to‘g‘ri qaror” deb hisoblashini aytgan.

Eslatib o‘tamiz, avvalroq AQSH Prezidenti Donald Tramp NATOning Anqaradagi sammiti doirasida Ukraina Prezidenti Vladimir Zelenskiy bilan uchrashuvda AQSH Ukrainaga Patriot havo mudofaa tizimi uchun tutib qoluvchi raketalarni ishlab chiqarish litsenziyasini berishi mumkinligini bildirgandi.