АҚШ учун Эрон билан уруш харажати 100 млрд долларга етди

Урушнинг 94-кунига келиб Эрон билан низонинг АҚШ учун қиймати 100 миллиард долларга етди. Бу ҳақда “Iran War Cost Tracker” портали маълумотларида келтирилган.

Ироқнинг “Al-Motala” ахборот-таҳлилий порталига кўра, АҚШ ва Исроилнинг Яқин Шарқда кескинликни кучайтириш стратегияси ўз мақсадларига эришмади, Эрон эса минтақадаги аввалги ҳарбий ҳаракатлар қоидаларини ўзгартиришга тайёрлигини намойиш этмоқда. 

“Бутун минтақа бўйлаб сиёсий ва ҳарбий алоқалар фаоллашган бир шароитда Яқин Шарқ жарлик ёқасида турибди. Вазиятни юмшатиш уринишлари янги кенг кўламли портлаш эҳтимоли билан чамбарчас боғланиб кетган. Бу воқеалар бир томондан Эрон, иккинчи томондан АҚШ ва Исроил ўртасида давом этаётган прокси уруш фонида юз бермоқда, бунда Ливан қарама-қаршиликнинг энг заиф ва критик нуқталаридан бирига айланди”, дейилади хабарда.

Урушнинг 94-кунига келиб, Эрон билан низонинг АҚШ учун қиймати 100 миллиард долларга етди. АҚШ Давлат департаменти раҳбари Марко Рубио Эрон билан келишув бугун, эртага ёки кейинги ҳафтада амалга ошиши мумкинлигини айтди. Ўз навбатида, CBS телеканали Эроннинг юқори мартабали ҳарбий мулозимига таяниб, АҚШ билан урушнинг қайта бошланиши “муқаррар” бўлиб кўринаётганини қайд этмоқда

“Reuters”нинг хабар беришича, Америка нефтининг Осиёга экспорти мисли кўрилмаган даражада ўсганига қарамай, Эрон томонидан Ҳормуз бўғози ёпиб қўйилган тақдирда юзага келадиган хомашё тақчиллигини қоплай олмайди.

Экспертларнинг фикрича, сўнгги пайтларда Осиё бозорига Қўшма Штатлардан рекорд ҳажмдаги нефть кириб келаётган бўлса-да, ушбу стратегик муҳим транспорт артерияси блокланган тақдирда жаҳон балансидан чиқиб кетадиган энергия ресурслари ҳажмининг ўрнини бу оқим жисмонан боса олмайди.

Ҳормуз бўғози жаҳон энергия таъминоти учун асосий тугун бўлиб қолмоқда ва ушбу минтақадан етказиб беришнинг эҳтимолий тўхташи натижасида юзага келадиган “бўшлиқни” бошқа манбалар, жумладан, АҚШ ресурслари ҳисобига тўлдириб бўлмайди. 

Эслатиб ўтамиз, аввалроқ Яқин Шарқдаги можаро фонида дунё бўйлаб авиачипталар нархи одатдаги ёзги қимматлашувдан ташқари яна 10–15 фоизга ошгани ҳақида хабар берилган эди.