АҚШ Трампнинг буйруғи билан Эронга янги зарбалар берди (видео)

АҚШ ҳарбийлари Ҳормуз бўғозидаги кескинлик кучайиши ортидан Эронга қарши янги ҳужумлар бошлади. Бу ҳақда АҚШ Марказий қўмондонлиги (CENTCOM) хабар берди.

Қўмондонликнинг маълум қилишича, кеча, 12 июль куни тунда Эроннинг Ҳормуз бўғози орқали ҳаракатланаётган фуқаролик ва тижорат кемаларига таҳдид солиш имкониятларини чеклаш мақсадида янги зарбалар бошланган. CENTCOM баёнотида Президент Дональд Трамп ушбу ҳужумларга Эрон кучларини жавобгарликка тортиш мақсадида шахсан кўрсатма бергани қайд этилган. 

“Биз уларни қаттиқ зарбага тутяпмиз”, деган Трамп дам олиш кунларидаги ҳужумларга изоҳ бериб.

Эрон эса жавоб тариқасида минтақада АҚШ ҳарбий базалари жойлашган давлатларга ҳужум қилган. Иордания армияси Эрон томонидан учирилган тўртта ракетани йўқ қилганини маълум қилган. Қувайт Қуролли кучлари ҳам Эроннинг Форс кўрфазидаги АҚШ манфаатларига қарши зарбалари вақтида “душманона ҳаво нишонлари”га қарши ҳаракат қилаётганини билдирган.

Бу ҳужумлар Эроннинг дунё энергетикаси учун муҳим ҳисобланган Ҳормуз бўғозидаги кема қатнови устидан назоратни кучайтиришга уриниши ортидан юз бераётган ўзаро зарба алмашинувининг навбатдаги босқичи бўлди. Бироқ бу галги ҳужумлар кўлами ва суръати анча кенгайгани таъкидланмоқда.

CENTCOM маълумотига кўра, фақат 11 июль кечасининг ўзида Эрон ҳудудига тахминан 140 та зарба амалга оширилган. Шу билан бирга, айрим кемалар Ҳормуз бўғози орқали ҳаракатланишда давом этаётгани билдирилган.

Эслатиб ўтамиз, аввалроқ АҚШ Президенти Дональд Трамп агар Эрон унга суиқасд уюштиришга уринса, Қўшма Штатлар мисли кўрилмаган зарба билан жавоб қайтаришини маълум қилганди. Трамп 1 000 та ракета учиришга тайёр ва Эрон Ислом Республикасига қаратилганини айтганди.