АҚШ Суриядан қўшинларини чиқариш режасини тайёрламоқда – ОАВ

Пентагон АҚШ қўшинларини Суриядан чиқариш режасини ишлаб чиқмоқда. Бу ҳақда икки Пентагон вакилига таяниб, NBC телеканали хабар берди.

Манбаларга кўра, Пентагон мутахассислари ўтган йил декабрь ойида собиқ президенти Башар Асад ағдарилган Суриядан Американинг ҳарбий контингентларини чиқариш бўйича бир нечта режа тайёрламоқда. Бу режалар амалиётнинг давомийлиги билан фарқланади – 30, 60 ёки 90 кун.

31 январь куни АҚШ Президенти Дональд Трампнинг миллий хавфсизлик бўйича маслаҳатчиси Майк Уолтц АҚШнинг юқори ҳарбий қўмондонлиги вакиллари билан учрашган. Учрашувда томонлар Яқин Шарқдаги вазиятни муҳокама қилган. Бироқ Оқ уй вакили NBC телеканалига берган интервьюсида Уолтц учрашув давомида Суриядаги АҚШ қўшинлари сонининг камайтирилиши ҳақида сўзлаганини инкор этган. Пентагон эса бу борада изоҳ бермади.

Маълумот учун, 2019 йил охирида Трамп ўзининг биринчи президентлик даврида мудофаа вазири Жеймс Маттисга АҚШ қўшинларини Суриядан чиқаришни буюрганди. Маттис бундай қарорга қарши чиққан ва ишдан бўшаган. Трамп кўп сонли қўшинларни олиб чиққан, аммо кейинчалик уларни ортга қайтариб юборган. Ўшандан бери АҚШ қўшинлари Сурия ҳудудида бўлиб келмоқда. 2020 йил декабрида АҚШ Сурия Республикасига тахминан 2000 ҳарбий хизматчи жўнатган. Олдинроқ у ерда 900 га яқин ҳарбий хизматчи жойлашган эди. Уларнинг 30 дан 90 кунгача, 900 кишилик асосий контингент эса тахминан бир йил давомида Сурияда қолиши белгиланган.

2024 йил бошида Яқин Шарқ Институтининг Сурия ва терроризмга қарши кураш бўйича дастур директори Чарльз Листер Суриядан АҚШнинг тўлиқ чиқиб кетишининг минтақадаги хавфсизликка келтириши мумкин бўлган ҳалокатли оқибатлари ҳақида ёзган. У ўшанда собиқ президент Жо Байден администрацияси бундай режаларнинг муҳокамасини олиб бориб, Суриядаги миссияга молиявий ёрдамни тўхтатганини таъкидлаган. Листер АҚШнинг Суриядан чиқиши ИШИД учун совға бўлишини ва бу гуруҳнинг қайта жонланиши мумкинлигидан огоҳлантирган.

Эслатиб ўтамиз, аввалроқ Сурияда ҳокимият алмашинишидан сўнг Туркия ўзининг ҳарбий иштирокини мамлакатда кенгайтиришни режалаштираётгани маълум бўлганди. Сурия разведка хизматларидаги манбалар томонлар мудофаа пактини имзолашни режалаштираётганини ва бу пакт доирасида Анқаранинг Сурия шарқидаги Бадият деб номланган чўл ҳудудида иккита ҳарбий база қуриши мумкинлигини айтган. Туркия у ерда 50 та F-16 қирувчи самолётларини жойлаштиришни режалаштирмоқда ва Сурия ҳаво майдонидан ҳарбий мақсадлар учун фойдаланиш учун рухсат олишни истамоқда. Бунинг эвазига Туркия ташқи таҳдидлар юзага келганда ёрдам кўрсатиш мажбуриятини олади.