АҚШ “Росатом” қураётган АЭСга санкцияларни бекор қилди

Америка Қўшма Штатлари “Росатом” томонидан Венгрияда қурилаётган атом электр станциясини (АЭС) санкциялар рўйхатидан чиқарди. Бу ҳақда кеча, 12 ноябрь куни АҚШ Давлат котиби Марко Рубио Канадада бўлиб ўтган “Катта еттилик” (G7) мамлакатлари Ташқи ишлар вазирларининг учрашувидан сўнг маълум қилди.

“АЭСнинг иккинчи босқичи аллақачон қуриляпти ва улар (венгерлар) уни тугатишлари керак. Лойиҳа Россия компанияси томонидан ишлаб чиқилган ва амалга оширилаётгани учун, биз улар уни якунлай олишини хоҳлаймиз”, деди Рубио. 

Унинг таъкидича, бу Венгриянинг энергетик мустақиллиги учун зарур.

“Росатом” иштирокида “Пакш” атом станциясини кенгайтиришга қарши санкциялар 2024 йил ноябрида демократ Жо Байден раҳбарлигидаги АҚШнинг олдинги маъмурияти томонидан жорий этилган эди. 2025 йил 29 июнда Венгрия Ташқи ишлар вазири Петер Сийярто маълум қилганидек, республикачилар раҳбари Дональд Трампнинг янги маъмурияти бу чекловларни бекор қилди.

11 сентябрь куни Люксембургдаги Европа Иттифоқи суди ЕИ Комиссиясининг Венгриянинг Россия билан ҳамкорликда янги “Пакш” энергоблокларини қуриш учун ажратган молиявий ҳиссасини маъқуллаган қарорини бекор қилди. Суднинг таъкидлашича, Еврокомиссияда Будапештнинг “Росатом” концерни билан тендерсиз тўғридан тўғри шартнома тузишини маъқуллаш учун етарли асослар бўлмаган.

Россия ва Венгрия 2014 йилда “Пакш” АЭСда 5 ва 6-энергоблокларни (“Пакш-2”) қуриш бўйича ҳужжатларни имзолаган. Лойиҳанинг умумий қиймати 12,5 миллиард евро деб баҳоланган. 2022 йил август ойида Венгрия атом энергетикаси агентлиги “Росатом”га қурилишга рухсат берган. 2023 йил май ойида Еврокомиссия станция қурилиши ва лойиҳани молиялаштириш бўйича келишувларга киритилган ўзгартиришларни маъқуллади.

Ўша йилнинг ноябрида Венгрия ҳукумати ва Россия давлат корпорацияси иш жадвалини имзолаган. Икки янги энергоблокни тармоққа улаш 2030 йиллар бошига мўлжалланган.

Сийяртонинг айтишича, Венгрия ва Россия ўртасидаги ҳисоб-китоблар Россиянинг “Газпромбанк” орқали амалга оширилган – ушбу банк 2024 йил ноябрида АҚШ санкцияларига тушган эди. 2024 йил декабрида эса Брюссель АҚШдан “Газпромбанк”ка нисбатан санкцияларни юмшатишни сўраган, чунки у Европа мамлакатларига Россия гази учун тўловларда ҳал қилувчи роль ўйнайди.