АҚШ Президенти Путин билан Хитойда учрашадими? Сўз Трампга

АҚШ Президенти Дональд Трамп яқин келажакда Хитойга ташриф буюриши мумкинлигини тан олди. Бу ҳақда у бугун, 22 июль куни филиппинлик мавқедоши кичик Фердинанд Маркос билан Оқ уйда бўлиб ўтган учрашувда маълум қилди.

“Хитой раҳбари Си Цзиньпин мени Хитойга таклиф қилди ва биз буни яқин келажакда қиламиз”, деди Трамп. 

Унинг қўшимча қилишича, тез орада бу борада қарор қабул қилади. Шунингдек, Трамп россиялик мавқедоши Владимир Путин билан Хитойга эҳтимолий ташрифи доирасида учрашув ўтказиш имкониятини инкор этмади ёки тасдиқламади.

“Биз кўп учрашувлар ўтказишимиз мумкин”, деди у журналистларнинг Путин билан учрашуви Пекинда бўлиши мумкинми, деган саволига жавоб берар экан.

Маълумот учун, 3 сентябрь куни Пекинда Иккинчи жаҳон урушидаги ғалабанинг 80 йиллиги ва Хитой халқининг Япония агрессиясига қарши кураш уруши шарафига ҳарбий парад бўлиб ўтади. Парадда Хитой ўз арсеналидаги ўзи ишлаб чиқарган ускуналарини намойиш этади.

Эслатиб ўтамиз, олдинроқ Британиянинг “The Times” газетаси АҚШ Президенти Дональд Трамп сентябрь ойи бошида Хитой раҳбари Си Цзиньпин ва Россия Президенти Владимир Путин билан учрашиш учун Пекинга таклиф қилиниши мумкинлигини хабар қилганди. Кремль матбуот котиби Дмитрий Песков ҳам Трамп кузда Америка компаниялари раҳбарлари билан Хитойга ташриф буюрса, у ерда Россия Президенти Владимир Путин билан учрашиши мумкинлигини айтди.