АҚШ Мексикага ҳарбий ҳаракатлар билан таҳдид қилди – WSJ

Пентагон раҳбари Пит Ҳегсет Мексика ҳарбий қўмондонлиги билан музокаралар чоғида АҚШ Қуролли кучлари томонидан “бир томонлама ҳаракатлар” амалга оширилиши билан таҳдид қилган. У Мексика ҳукумати ва наркокартеллар ўртасидаги “тил бириктириш” масаласи ҳал этилмаса, Америка ҳарбийлари чора кўриши мумкинлигини билдирган. Бу ҳақда ўз манбаларига таяниб, “The Wall Street Journal” хабар берди.

Нашрнинг ёзишича, ушбу суҳбат жорий йилнинг 31 январь куни бўлиб ўтган, бу Пентагоннинг янги раҳбари ва Мексика ҳарбий қўмондонлиги ўртасидаги биринчи расмий алоқа бўлган. WSJ манбалари Мексика ҳарбий раҳбарияти Ҳегсетнинг оҳангидан “ҳайратга тушгани ва ғазаблангани”ни айтган, чунки унинг сўзлари мамлакат ҳудудида кенг кўламли ҳарбий ҳаракатлар бошланиши таҳдиди сифатида қабул қилинган.

Нашрнинг ёзишича, Мексика ҳукумати ҳозирда вазиятни юмшатиш йўлларини фаол изламоқда. Музокаралар давом этмоқда ва асосий сана 4 март бўлиши кутилмоқда – айнан шу куни АҚШ Мексикага қарши чораларни кучайтириши ва божларни жорий этиши мумкин. Февраль ойи бошида Мексика божларнинг бир ойга кечиктирилишига эришди ва АҚШга наркотик моддалар контрабандасининг олдини олиш мақсадида чегара ҳудудига 10 минг нафардан ортиқ Миллий гвардия аскарларини жойлаштирди.

Эслатиб ўтамиз, аввалроқ АҚШ Президенти Дональд Трамп Мексикага босим ўтказиб, мамлакат ноқонуний миграция ва наркотик етказиб беришга қарши кескин чоралар кўрмаса, Мексика маҳсулотларига 25 фоизлик бож жорий қилиш билан таҳдид қилган эди. Энди эса иқтисодий санкцияларга қўшимча равишда Мексика ҳукумати ҳақиқий ҳарбий босқиндан хавотирда.

Дональд Трамп инаугурациядан сўнг дарҳол АҚШнинг жанубий чегарасида фавқулодда ҳолат эълон қилган ва у ерга қўшимча қўшин юборган эди. Бундан ташқари, у наркотик ишлаб чиқарилаётган Мексика лабораторияларига зарба бериш эҳтимоли ҳақида бир неча бор баёнот берган.