АҚШ “хитойпараст” ЖССТ билан муносабатларини бутунлай узди

Жаҳон соғлиқни сақлаш ташкилоти (ЖССТ) зарур ислоҳотларни амалга оширишдан бош тортди. Шу сабаб Вашингтон ушбу ташкилот билан барча алоқаларни узди. Бу ҳақда кеча, 29 май куни АҚШ Президенти Дональд Трамп маълум қилди.

"Улар керакли ислоҳотларни амалга ошира олмаганликлари сабабли, бугун биз Жаҳон соғлиқни сақлаш ташкилоти билан алоқаларимизни узаяпмиз ва молиявий ресурсларимизни дунёдаги соғлиқни сақлаш соҳасидаги бошқа долзарб муаммоларга йўналтирмоқдамиз", дейди Трамп Оқ уйдаги нутқида.

Унинг таъкидлашича, Қўшма Штатлар ЖССТнинг ислоҳотларнинг батафсил режасини тақдим этганида, ташкилот улар билан учрашишдан бош тортган. Трамп, шунингдек, АҚШ илгари ЖССТга тахминан 450 миллион доллар ажратганини, Хитой эса «атиги» 40 миллион доллар ажратганини эслади.

Апрель ойида Трамп унинг маъмурияти ЖССТни молиялаштиришни вақтинча тўхтатганини эълон қилди. Вашингтонда эса коронавирус пандемияси билан Жаҳон соғлиқни сақлаш ташкилоти инқирозга қандай муносабатда бўлганлигини ўрганмоқда. Хусусан, АҚШ Президенти ушбу ташкилотни "хитойпараст" деб атади.

Кейинчалик Трамп, ЖССТ Бош директори Тедрос Адҳаном Гебрейесусга хат ёзиб, унда ташкилот кейинги 30 кун ичида ўз ишида "сезиларли яхшиланишларни" ўз зиммасига олмаса, кескин чора-тадбирлар тўғрисида огоҳлантирган. Президент ўз мактубида ЖССТ коронавируснинг турли огоҳлантириш белгиларини ўтказиб юборган ёки эътиборсиз қолдирганини ва Хитойга нисбатан позициясини танқид қилган бир қатор айбловларни илгари сурган.