АҚШ “Green Card” олиш тартибини ўзгартирмоқда

АҚШда “Green Card” олишни истаган хорижликлар эндиликда аризани мамлакат ичида эмас, балки ўз давлатида туриб топшириши керак бўлади. Бу ҳақда “Reuters” хабар берди.

АҚШ Фуқаролик ва иммиграция хизмати янги сиёсатга оид меморандум эълон қилиб, иммиграцион мақомни ўзгартиришни истаган шахслар аризани Давлат департаменти орқали хориждан топшириши лозимлигини билдирган.

АҚШ Ички хавфсизлик департаментига кўра, мамлакатда вақтинча бўлиб турган ва доимий яшаш ҳуқуқини олишни истаган хорижликлар ўз ватанига қайтиши керак бўлади.

“Бу сиёсат иммиграция тизимининг қонун билан белгиланган тартибда ишлашини таъминлайди ва турли бўшлиқлардан фойдаланишни рағбатлантирмайди”, дейилади баёнотда.

АҚШ Ички хавфсизлик департаменти янги тартиб агентлик ресурсларини бошқа иммиграция ишларига йўналтириш имконини беришини билдирган. Бироқ мигрантлар ва қочқинларга ёрдам кўрсатувчи HIAS ташкилоти ушбу қарорни танқид қилган. Ташкилотга кўра, янги сиёсат одам савдоси қурбонлари ҳамда зўравонликдан қочган болаларни хавфли мамлакатларига қайтишга мажбур қилиши мумкин.

Қайд этилишича, бу Дональд Трамп маъмуриятининг миграцияни чеклашга қаратилган навбатдаги чораси ҳисобланади.

Эслатиб ўтамиз, аввалроқ АҚШ Давлат департаменти вақтинчалик виза олиш учун мурожаат қилувчиларни текширишнинг янги тартибини жорий этганди. Унга кўра, аризачилар ўз мамлакатида таъқиб ёки хавфга дуч келмаганини ҳамда у ерга қайтишдан қўрқмаслигини тасдиқлаши керак бўлади. Айрим ҳолларда ушбу саволларга жавоб бермаслик ҳам виза рад этилишига сабаб бўлиши мумкин.