АҚШ Эронга қарши санкцияларини янгилади

АҚШ Эроннинг ракета ва ҳарбий самолётларини ишлаб чиқаришга алоқадор фирма ва шахсларга нисбатан санкцияларини янгилади. Бу ҳақда АҚШ Давлат департаменти матбуот хизмати хабар берди.

Маълум қилинишича, Трамп маъмурияти Эронга ядровий мажбуриятларини бажармагани учун Теҳроннинг ядровий дастури, баллистик ракеталар ва ҳарбий самолётлар дастурларини қўллаб-қувватловчи ва қурол-яроғ харид қилиш тармоқларига алоқадор бир қатор компаниялар, 44 нафар жисмоний ва юридик шахсга нисбатан санкция эълон қилган.

Баёнотда қайд этилишича, АҚШ 2004 йилгача ядровий қурол дастурининг давомчиси ҳисобланган Эроннинг Мудофаа инновациялар ва тадқиқотлар ташкилотига алоқадор беш нафар шахс ва бир ташкилотга нисбатан ҳам санкция киритган.

“АҚШ Президенти Дональд Трамп Миллий хавфсизлик бўйича 2-меморандумида аниқ таъкидлаганидек, Қўшма Штатлар Эронни ядровий қуролга олиб борадиган барча йўлларга тўсқинлик қила олади. Теҳроннинг ядровий қуролларни тарқатиш фаолиятини қўллаб-қувватлаган ҳар қандай компания ва шахсларга нисбатан санкция жорий этишдан чекинмаймиз. Янги санкциялар Эроннинг ядровий, ракета ва ҳарбий дастурлари билан боғлиқ 44 та субъектни нишонга олади”, дейди АҚШ Давлат котиби Марко Рубио.

Қайд этиш жоиз, санкциялардан бир неча кун аввал Эрон Президенти Масъуд Пезешкиён мамлакат ядро қуролини тарқатмаслик тўғрисидаги шартномадан чиқишдан бош тортганини маълум қилган. Бунга жавобан жорий йилнинг 27 сентябрь куни БМТ Хавфсизлик Кенгаши Эронга қарши санкциялар ўн йиллик танаффусдан сўнг тикланганини эълон қилган. Санкциялар қурол эмбаргоси, уранни бойитиш ва қайта ишлашни тақиқлаш, баллистик ракета фаолиятини чеклаш, хорижий уран лойиҳаларида улушларни қўлга киритишни тақиқлаш, ўнлаб Эрон жисмоний ва юридик шахсларининг активларини музлатиш, Эрон расмийларининг саёҳатларини тақиқлаш ва ядровий дастур учун материаллар етказиб беришни чеклашдан иборат.

Эслатиб ўтамиз, аввалроқ Эрон Ташқи ишлар вазирлиги БМТ санкцияларининг қайта тикланиши ортидан баёнот бериб, Эрон халқининг манфаатлари ва ҳуқуқларига зарар етказишга қаратилган ҳар қандай уринишларга жавоб қайтарилишини билдирган эди.

Бунёд Келдибоев