Эрон санкциялар тикланишини жавобсиз қолдирмоқчи эмас

Теҳрон БМТ санкцияларининг қайта тикланиши туфайли Эрон халқининг манфаатлари ва ҳуқуқларига зарар етказишга қаратилган ҳар қандай уринишларга жавоб қайтаради. Бу ҳақда Эрон Ташқи ишлар вазирлиги баёнот берди.

“Дипломатия ва ҳамкорлик учун зарур шароит яратиш ўрнига, Буюк Британия, Франция, Германия ҳамда АҚШ инқироз йўлини танлади. Улар бекор қилинган БМТ резолюцияларини қайта тиклаш орқали янги босим воситаларига эга бўлишига ишонмоқда”, дейилади вазирлик хабарида.

Шунингдек, Эрон томони АҚШ ва Европа мамлакатларининг умидлари бир пулга айланиб, улар хоҳлаган натижага эришолмаслигини таъкидлаган.

“Эрон Ислом Республикаси миллий ҳуқуқ ва манфаатларини қатъият билан ҳимоя қилади ва халқимиз манфаатларига зарар етказишга қаратилган ҳар қандай ҳаракатга муносиб ва қатъий жавоб қайтаради”, дея қўшимча қилинади вазирлик баёнотида.

Эслатиб ўтамиз, аввалроқ БМТ Эрон устидан санкцияларни қайта жорий қилгани хабар қилинган эди. Янги чекловлар Эроннинг хориждаги активларини музлатиш, атом технологияларини ишлаб чиқишга тақиқ қўйиш ва қурол етказиб беришга чеклов қўйишни ўз ичига олади.

Буюк Британия, Франция ва Германия Ислом Республикасини Эрон ядровий дастурини тартибга солувчи қўшма кенг қамровли ҳаракатлар режаси бўйича мажбуриятларини бажармаганликда айблади. Россия ва Хитой эса Эрон санкцияларини кечиктиришни таклиф қилган, бироқ БМТ Хавфсизлик Кенгаши бу резолюция лойиҳасини рад этган.