АҚШ ҳарбийлари Эрон портига йўл олган танкерга зарба берди (видео)

АҚШ ҳарбийлари Эроннинг нефть портига йўл олган нефть танкерини Hellfire ракетаси билан уриб, ҳаракатсиз ҳолатга келтирганини маълум қилди. Бу ҳақда АҚШ Марказий қўмондонлиги X ижтимоий тармоғида хабар берди.

Маълум қилинишича, 2 июнь куни АҚШ ҳарбийлари Форс кўрфазидаги Эрон портига йўл олган бўш нефть танкерини тўхтатган.

АҚШ томони “блокада чоралари” Ботсвана байроғи остида сузаётган M/T Lexi танкерига нисбатан қўлланганини билдирган. Кема халқаро сувларда Харк ороли томон ҳаракатланаётган бўлган.

АҚШ Марказий қўмондонлиги баёнотига кўра, танкер экипажи АҚШ ҳарбийларининг бир неча бор берилган огоҳлантиришларини эътиборсиз қолдирган ва 24 соат давомида кўрсатмаларга бўйсунмаган.

“Оқибатда АҚШ ҳарбий самолёти танкернинг машина бўлимига Hellfire ракетасини учирди. Натижада кема ҳаракатсиз ҳолатга келтирилди ва Эрон ҳудудига етиб бора олмади”, дейилади баёнотда.

АҚШ Марказий қўмондонлигининг таъкидлашича, 13 апрелдан буён Эрон портларига кирувчи ва улардан чиқувчи барча денгиз қатновларига нисбатан блокада жорий этилган.

АҚШ ҳарбийлари маълумотига кўра, Эрон билан сулҳ давом этаётган вақтда олтита тижорий кема ҳаракатсизлантирилган, 122 та кема эса бошқа йўналишга бурилган.

Аввалроқ оммавий ахборот воситалари АҚШ Қуролли кучлари сўнгги ҳафталарда ўнлаб савдо кемаларининг Ҳормуз бўғози орқали ўтишини мувофиқлаштиришга ёрдам берганини хабар қилган эди. Бироқ Эрон ҳаракатлари сабаб ушбу денгиз йўли ҳануз хавфли бўлиб қолмоқда.

АҚШ вице-президенти Жей Ди Вэнс 28 май куни АҚШ ва Эрон ўзаро англашув меморандуми бўйича келишувга эришишга жуда яқин эканини билдирган. Бироқ АҚШ Президенти Дональд Трамп ҳужжатни ҳали тасдиқламаган.

Эслатиб ўтамиз, аввалроқ Дональд Трамп Эроннинг Вашингтон билан музокаралар тўхтатилгани ҳақидаги баёнотларини рад этганди. Трампнинг таъкидлашича, ҳатто музокаралар тўхтатилган тақдирда ҳам бу АҚШнинг Эронга қарши ҳарбий зарбалар беришини англатмайди. Бироқ у Ҳормуз бўғозидаги Эрон портларига нисбатан жорий этилган чекловлар сақланиб қолишини билдирган.