Трамп Эрон билан музокаралар тўхтатилганини рад этди

АҚШ Президенти Дональд Трамп Эроннинг Вашингтон билан музокаралари тўхтатилгани ҳақидаги баёнотларини рад этди. Унинг таъкидлашича, Теҳрон билан мулоқот ҳали ҳам давом этмоқда. Бу ҳақда у ўзининг Truth Social ижтимоий тармоғида маълум қилди.

“Эрон Ислом Республикаси билан музокаралар жуда тез суръатларда давом этмоқда”, деб ёзди Трамп.

Шунингдек, у NBC News телеканалига берган интервьюсида Эрон томони АҚШни музокаралар тўхтатилгани ҳақида хабардор қилмаганини айтди.

“Менимча, биз ҳаддан ташқари кўп гапирдик. Баъзан сукут сақлаш энг яхши ечим бўлиши мумкин”, деди АҚШ Президенти.

Трампнинг таъкидлашича, ҳатто музокаралар тўхтатилган тақдирда ҳам бу АҚШнинг Эронга қарши ҳарбий зарбалар беришини англатмайди. Бироқ у Ҳормуз бўғозидаги Эрон портларига нисбатан жорий этилган чекловлар сақланиб қолишини билдирган.

Аввалроқ, Эроннинг “Tasnim” агентлиги Теҳрон ва Вашингтон ўртасидаги билвосита музокаралар вақтинча тўхтатилганини маълум қилган эди. Агентликка кўра, бунга Исроилнинг Ливандаги “Ҳизбуллоҳ” объектларига берган зарбалари сабаб бўлган.

Эрон расмийлари ҳам ҳозирча АҚШ билан урушни якунлаш бўйича якуний келишувга эришилмаганини билдирган.

Эслатиб ўтамиз, аввалроқ Дональд Трамп Исроил ва “Ҳизбуллоҳ” ўт очишни тўхтатиш бўйича келишувга эришганини маълум қилган эди.

Трампнинг билдиришича, у Исроил Бош вазири Биньямин Нетаньяҳу билан самарали телефон мулоқоти ўтказган. Суҳбат натижасида Байрутга қўшин киритиш режаси бекор қилинган, йўлга чиққан ҳарбий бўлинмалар эса ортга қайтарилган.