Исроил ва “Ҳизбуллоҳ” ўт очишни тўхтатишга келишди – Трамп

АҚШ Президенти Дональд Трамп Исроил ва “Ҳизбуллоҳ” ўт очишни тўхтатиш бўйича келишувга эришганини маълум қилди. Бу ҳақда у ўзининг Truth Social ижтимоий тармоғида ёзиб қолдирди.

Трампнинг билдиришича, у Исроил Бош вазири Биньямин Нетаньяҳу билан самарали телефон мулоқоти ўтказган. Суҳбат натижасида Байрутга қўшин киритиш режаси бекор қилинган, йўлга чиққан ҳарбий бўлинмалар эса ортга қайтарилган.

АҚШ Президенти, шунингдек, воситачилар орқали “Ҳизбуллоҳ” вакиллари билан ҳам мулоқот қилганини айтиб, томонлар ўртасида ўт очишни тўхтатиш бўйича келишувга эришилганини таъкидлаган. Унга кўра, Исроил “Ҳизбуллоҳ” позицияларига зарба бермайди, ҳаракат эса Исроил ҳудудини нишонга олмайди.

Аввалроқ Эроннинг “Tasnim” агентлиги Теҳрон Исроилнинг Ливандаги ҳаракатларига норозилик сифатида АҚШ билан музокараларни вақтинча тўхтатганини хабар қилган эди.

Агентлик маълумотига кўра, Эрон Ливандаги вазиятни тинчлик шартларининг муҳим қисми деб ҳисобламоқда ва Исроил қўшинларининг Ливан ҳудудидан олиб чиқилишини талаб қилмоқда. Теҳрон ўз позицияси инобатга олинмагунча музокараларни қайта тикламаслигини билдирган.

Бундан ташқари, Эрон ва унга яқин кучлар Ҳурмуз бўғозини блоклаш ҳамда бошқа фронтларда босимни кучайтиришга тайёр эканини маълум қилган.

Эслатиб ўтамиз, аввалроқ АҚШ Президенти Дональд Трамп Исроил Бош вазири Биньямин Нетаньяҳу билан телефон орқали мулоқот чоғида уни кескин танқид қилиб, “ақлдан озган” деб атагани ҳақида хабар берилган эди. Нашр маълумотига кўра, Трамп суҳбат давомида Нетаньяҳуга нисбатан қўпол иборалар ишлатган.