2 йил олдин ёпилган Андижон аэропорти қайта очилди

Андижон халқаро аэропортида аэродром реконструкциясининг биринчи босқичи якунланди ва бугун, 15 март куни 10:30 да Андижон халқаро аэропорти Uzbekistan Airways авиакомпаниясининг Тошкент-Андижон йўналиши бўйича биринчи техник рейсини қабул қилди. Бу ҳақда “Uzbekistan Airports” хабар берди.

Қайд этилишича, аэропортда реконструкциянинг биринчи босқичи якунланган. Унинг доирасида аэродром мажмуасининг салмоқли қисми, жумладан, узунлиги 3300 метр ва эни 60 метр бўлган янги 4E тоифали учиш-қўниш йўлаги, битта юриш йўлаги ва 3 та самолёт тўхташ жойига эга перрон қурилиши якунланган.

“Таъкидланиш жоиз, Андижонда аэродром қопламасининг янги элементлари (учиш-қўниш йўлаги, юриш йўлаги ва перрон) бетондан қурилган. Қопламанинг юк кўтариш қобилиятини аниқловчи тасниф рақами – PCN - 64R/B/W/T. Бу аэропортга Boeing 787, 747, Airbus A330 каби кенг фюзеляжли самолётлар ва қуйи тоифадаги самолётларни чекловларсиз қабул қилиш имконини беради. Кучлироқ ва бардошлироқ бўлган бетон учиш-қўниш йўлаклари иссиқ иқлим шароитида оптимал ечим. Бугунги кунга қадар Навоий ва Термиз аэропортларида ҳам бетон учиш-қўниш йўлаклари қурилган”, дейилади хабарда.

Шунингдек, аэродромда иккинчи юриш йўлаги ва 7 та самолётлар тўхташ жойига эга перрон қурилиши давом эттирилиб, ICAO CAT-II тоифасидаги радар, метеорологик ва ёритиш ускуналарини ўрнатиш бўйича қурилиш-монтаж ишлари олиб борилмоқда. Бу бир вақтнинг ўзида 10 тагача самолётга перронда хизмат кўрсатиш ва тунги вақтда ҳамда ноқулай об-ҳаво шароитида самолётларни қабул қилиш имконини беради. Бу, ўз навбатида, Андижон шаҳри ва Фарғона водийсига қатновлар сонини ва йўловчилар оқимини кўпайтириш имконини беради.

Маълумот учун, Андижон аэропорти аэродром мажмуасини тўлиқ реконструкция ва модернизация қилиш муносабати билан 2023 йил 1 апрель куни ёпилган. Аэродром қопламасининг элементлари – узунлиги 2985 метр ва кенглиги 44 метр бўлган учиш-қўниш йўлаги, юриш йўлаги ва перрони узоқ хизмат муддати ва паст юк кўтариш қобилияти туфайли реконструкция қилиниши талаб этилган ва кўплаб турдаги самолётларни қабул қилишда, шунингдек, замонавий ёритиш тизимининг йўқлиги сабабли тунги вақтда рейсларни қабул қилишда чекловлар мавжуд бўлган.

Андижон халқаро аэропорти тез орада мунтазам йўловчи рейсларини қабул қила бошлайди.

Эслатиб ўтамиз, олдинроқ Шаҳрисабз аэропорти учиш-қўниш йўлагида капитал таъмирлаш ишлари бошланиши муносабати билан 2025 йил 13 март Тошкент вақти билан соат 05:00 дан 2025 йил 25 март 05:00 гача ўз фаолиятини вақтинча тўхтатиши маълум қилинганди.