2,5 трлн сўмлик крипто-активларни айлантирган шахс ушланди (видео)

Фарғона вилоятида бир нечта криптобиржа орқали 2,5 триллион сўмга тенг крипто-активлар айланмасини амалга оширган шахс қўлга олинди. Бу ҳақда Ички ишлар вазирлиги Кибержиноятларга қарши курашиш департаменти хабар берди.

Қайд этилишича, жорий йилнинг 6 июль куни Фарғона вилояти Ички ишлар бошқармаси Кибержиноятларга қарши курашиш бошқармаси ходимлари томонидан тезкор тадбир ўтказилган. Тадбир давомида бир нечта криптобиржа орқали жами 2,5 триллион сўмга тенг крипто-активлар айланмасини амалга оширган шахс аниқланган.

Маълум қилинишича, у аввалроқ Жиноят кодексининг 168-моддаси (фирибгарлик) ва 211-моддалари (пора бериш) билан судланган. Тўпланган далиллар асосида унинг фаолиятига чек қўйилган.

Билдирилишича, мазкур ҳолат юзасидан Жиноят кодексининг 278-8-моддаси (Крипто-активлар айланмаси соҳасидаги қонунчиликни бузиш) билан жиноят иши қўзғатилган. Ҳозирда тергов ҳаракатлари давом этмоқда.

Гумонланувчи ўз изоҳида 2023 йилдан буён трейдинг билан шуғулланганини, брокерлик ҳисобини тўлдиришда крипто-ҳамёнлар ва крипто-валюталардан фойдаланганини айтган. У қилган ишидан пушаймонлигини билдирган.

Эслатиб ўтамиз, аввалроқ Фарғона вилоятида 19 ёшли йигит фирибгарлик ва кибержиноятда гумонланиб ушлангани ҳақида хабар берилган эди.