180 мингта сурат, 2 мингта видео: Эпштейн иши бўйича йирик ҳужжатлар архиви эълон қилинди

АҚШ Адлия вазирлиги Эпштейн иши бўйича энг йирик ҳужжатлар архивини эълон қилди. “Медуза” янги эълон қилинган файлларда кимларнинг номлари учрагани ҳақидаги маълумотларни жамлади.

Жорий йилнинг 30 январь куни АҚШ Адлия вазирлиги бир вақтлар бой ва таъсирчан молиячи бўлган, кейинчалик эса жинсий жиноятлар учун судланган ва қамоқда вафот этган Жеффри Эпштейн ишига оид навбатдаги ҳужжатлар тўпламини эълон қилди. Бу Эпштейн иши бўйича энг катта архив бўлиб, унда 3 миллиондан ортиқ саҳифа мавжуд. Адлия вазирлиги баёнотига кўра, бу сўнгги релиз бўлиб, энди янги ҳужжатлар чоп этилмайди. Бундай улкан ҳужжатлар массивини батафсил ўрганиш жуда кўп вақт талаб этади, бироқ журналистлар аллақачон Эпштейн ҳужжатларида қайси машҳур шахслар тилга олинганини аниқлашга улгурди. Эпштейн нуфузли дўстлар топишни яхши билган.

Янги ҳужжатлар пакетига Эпштейн ва унинг шериги Гислейн Максвелл билан боғлиқ жиноят ишларини тергов қилиш жараёнида тўпланган 3 миллион саҳифа матн, 180 мингта фотосурат ва 2 мингта видеоёзув киритилган. Бу Эпштейн архивининг энг йирик релизи бўлиб, эҳтимол, охиргиси ҳамдир. Адлия вазирлиги 2025 йил ноябрида қабул қилинган Эпштейн ҳужжатларини ошкор қилиш тўғрисидаги қонун бўйича ўз мажбуриятларини шу билан бажарганини маълум қилди.

Вазирлик маълумотига кўра, ҳозиргача Эпштейн архивларидаги 6 миллион саҳифанинг 3,5 миллиони ошкор қилинган. Қолган ҳужжатлар турли сабабларга кўра, жумладан, Эпштейн ва Максвелл ҳаракатларидан жабрланганларни ҳимоя қилиш мақсадида эълон қилинмайди. Шу билан бирга, Конгрессдаги демократлар Дональд Трамп маъмуриятининг ҳалоллигига шубҳа билдирмоқда. Трампнинг ўзи ҳам бир вақтлар Эпштейн билан дўст бўлган. Демократлар ҳужжатларнинг тўлиқ архивини эълон қилдиришга ҳаракат қилишларини билдирган.

Сўнгги кунларда журналистлар ҳужжатларнинг янги қисмини ўрганишни бошлашди. Аввало, Эпштейн алоқада бўлган машҳур шахсларнинг исмларини излашга эътибор қаратилди. У кўплаб таъсирли одамлар билан бевосита мулоқот қилган, бошқаларининг исмларини эса ёзишмаларда тилга олган. 

АҚШ Президенти Дональд Трамп

Эпштейннинг сўнгги электрон хатлар тўпламида Трамп фамилияси тилга олинган беш мингдан ортиқ файл бор. Бироқ бу Трамп билан тўғридан тўғри ёзишмалар эмас, балки кўпинча Эпштейннинг ўз хатларида ҳам эмас, балки у бошқаларга юборган газета мақолаларидаги эслатмалардир. Шунингдек, архивда нима сабабдандир 2025 йилда ФҚБ томонидан тузилган Трамп ва собиқ президент Билл Клинтонга нисбатан жинсий зўравонлик ҳақидаги айбловлар рўйхати ҳам бор. Эҳтимол, бу тасдиқланмаган айбловлардир. Трамп ҳам, Клинтон ҳам Эпштейн атрофидаги мулоқот доирасига кирган, бироқ унинг жиноятларидан бехабар бўлганини таъкидлаган.

Дунёдаги энг бой одам Илон Маск

Маск Эпштейн билан 2010 йилларнинг биринчи ярмида ёзишмалар олиб борган. Улар, хусусан, Эпштейн Кариб денгизидаги шахсий оролида уюштирган базмлар ҳақида гаплашишган. Аввалроқ Маск Эпштейн уни оролига “беҳуда тортмоқчи бўлганини” айтган, аммо эълон қилинган хатлар Маскнинг ўзи ҳам боришга қарши бўлмаганини кўрсатади. 2012 йил охиридаги хатлардан бирида у Эпштейндан “оролдаги энг телба базм” қачон бўлишини сўрайди ва ўша пайтдаги рафиқаси Талула Райли билан боришни режалаштираётганини ёзади. Бироқ бу режалар амалга ошганми-йўқми, хатлардан маълум эмас.

Буюк Британия қироли Чарлз III нинг укаси Эндрю

Эндрюнинг Эпштейн билан дўстлиги анчадан бери маълум. Ҳатто Эпштейн жинсий жиноятчи сифатида судланганидан кейин ҳам Эндрю бу алоқани узмаган. Молиячи қамоқда вафот этганидан сўнг Эндрю унинг хизматларидан фойдалангани маълум бўлди. Эпштейннинг энг машҳур айбловчиси Виржиния Жуффре 2001 йилда, ўзи 17 ёшда бўлганида Эпштейн уни Эндрю билан таништиргани ва у билан жинсий алоқа учун пул тўлаганини айтган.

Янги ҳужжатларга кўра, Жуффре ягона ҳолат бўлмаган. 2010 йилда Эпштейн Эндрюга 26 ёшли россиялик қиз билан танишишни таклиф қилган, уни чиройли, ақлли ва “ишончли” деб таърифлаган. Эндрю бу таклифга қизиқиш билдирган ва танишувдан мамнун бўлишини айтган. Шунингдек, Эпштейн архивида Эндрюнинг ерда ётган аёл устида тиз чўкиб турган суратлари ҳам топилган. Улар қачон ва қаерда олингани номаълум.

Microsoft асосчиси ва миллиардер Билл Гейтс

Эпштейн Гейтс билан алоқада бўлгани аввал ҳам маълум эди. ОАВ бу муносабатлар Билл ва Мелинда Гейтс ажрашувининг сабабларидан бири бўлганини ёзган. Эпштейн почтасида 2013 йил июлига оид, Гейтсга йўлланган, аммо ўзига юборилган икки мактуб бор. Уларда Эпштейн Гейтс энди у билан ҳамкорлик қилмаслик ва обрўсини сақлаш учун мулоқотни тўхтатганидан шикоят қилади. Шу билан бирга, у йиллар давомида Гейтсга энг шахсий масалаларда, жумладан, “россиялик қизлар билан жинсий алоқанинг оқибатларини енгиш учун” дори-дармон топишда ёрдам берганини ёзади. Гейтс бу хатлар мазмунини ёлғон деб атаган.

Норвегия валиаҳд маликаси Метте-Марит 

Камида 2011–2014 йилларда давом этган дўстона ёзишмаларда у Эпштейнни “жозибали” ва “ёқимли” деб атаган, Париж “хиёнат учун мос шаҳар” эканини ҳазил қилган. 2013 йилда Эпштейн билан алоқани узганини айтган Метте-Марит бу муносабатларни “уятли” деб атаган.

Virgin Group асосчиси ва миллиардер Ричард Брансон 

Янги ҳужжатларга кўра, Брансон Эпштейнни ўз оролида меҳмон қилган. 2013 йил сентябридаги мактубда Брансон Эпштейнни ташриф учун миннатдорлик билдиради ва яна келишга таклиф қилади.

“Агар бу томонда бўлсанг, сени кўришдан хурсанд бўламиз. Фақат ҳарамингни ҳам олиб кел”. Virgin Group бу учрашув ишбилармонлик характерида бўлганини, Эпштейн уч нафар “вояга етган аёл” билан келган бўлса-да, улар учрашувда иштирок этмаганини билдирган.

Кинорежиссёр Бретт Ратнер

“Соат тиғи” комедияси режиссёри Ратнер Эпштейннинг Нью-Йоркдаги уйида олинган суратда акс этган. Санаси номаълум суратда Ратнер ва Эпштейн икки аёл билан диванда ўтирган. Ҳолбуки, режиссёр уч йил аввал Эпштейн билан ҳеч қачон учрашмаганини айтган эди. У яна изоҳ беришдан бош тортган.

АҚШ Савдо вазири Говард Лютник

Ўтган йили Эпштейн ҳужжатлари атрофидаги можаро фонида Лютник Нью-Йоркда Эпштейннинг қўшниси бўлганини, 2005 йилда бир марта меҳмон бўлиб боргани, аммо уй ўртасида массаж столи турганини кўриб, бу “жирканч одам” билан бошқа ҳеч қачон “бир хонада бўлмасликка” қарор қилганини айтган. Аммо янги ҳужжатлар унинг ёлғон гапирганини кўрсатади: 2012 йилда у электрон почта орқали Эпштейн билан Рождество олдидан рафиқаси ва болалари билан унинг шахсий оролига боришни келишиб олган.

Россия Президенти Владимир Путин

Путиннинг фамилияси янги ҳужжатлар тўпламидаги мингдан ортиқ файлда учрайди. Турли одамлар билан ёзишмаларда Эпштейн Россия Президенти билан эҳтимолий учрашувни муҳокама қилади ва ҳатто 2013 йилда у билан кўришиш таклифини шартлар мос келмагани учун рад этганини даъво қилади. Бироқ архивда Эпштейннинг Путин билан ҳақиқатан ҳам учрашганини тасдиқловчи далиллар йўқ. Шу билан бирга, ҳужжатлар орасида 2017 йилга оид ФҚБ ҳисоботида Эпштейн Путиннинг яширин активларини бошқаришда алоқадор бўлгани ҳақидаги манба сўзлари келтирилган. “The Daily Mail” таблоидининг манбалари эса Эпштейн Россия ҳукуматлари манфаатлари йўлида жосуслик қилган бўлиши мумкинлигини ҳам истисно этмайди.