1 йил ичида 1,5 минг журналист Россия ва Беларусни тарк этди

2024 йилда 1500 га яқин россиялик ва беларуслик журналист Европа Иттифоқи мамлакатларига кўчиб ўтган. Бу ҳақда бугун, 3 февраль куни Еврокомиссия сайтида чоп этилган баёнотда сўз боради.

“Тахминий ҳисоб-китобларга кўра, биргина 2024 йилнинг ўзида Россия ва Беларусдан 1500 га яқин мустақил журналист ва таҳририятлар Европа Иттифоқи мамлакатларига қочиб ёки кўчиб кетган”, дейилади ҳисоботда.

Европа Комиссияси Европа Иттифоқи мамлакатларига кўчиб келган журналистларни қўллаб-қувватлаш учун 3 миллион евролик дастурни ишга туширган. 

“Унинг асосий мақсади – оммавий ахборот воситаларининг плюралистик муҳитини тарғиб қилувчи умумевропа платформаси ёки медиа марказлар тармоғини яратишни қўллаб-қувватлашдир”, дейилади баёнотда. 

Қайд этилишича, ушбу лойиҳа журналистлар “контент яратишда давом этишлари ва уни таҳририят аралашувисиз ўз аудиторияларига тарқатишлари” учун яратилган.

“Эркин, мустақил ва плюралистик оммавий ахборот воситаларини қўллаб-қувватлаш муҳим аҳамиятга эга”, дейилади хабарда. 

Эслатиб ўтамиз, 27 январь куни Европа Иттифоқи мамлакатлари Ташқи ишлар вазирлари Россия Федерациясига қарши санкцияларни узайтиришга келишиб олганди.