Ҳегсет иттифоқчиларини ношукрликда айблади

АҚШ Мудофаа вазирлиги раҳбари Пит Ҳегсет Американинг европалик ҳамкорлари ношукурлик қилаётганини айтди. Бу ҳақда у бугун, 19 март куни матбуот вакилларига йўллаган мурожаатида сўз очди.

“Бизнинг ношукур европалик иттифоқчиларимиз... АҚШ Президенти Дональд Трампга нисбатан фақат биргина туйғуни – миннатдорликни изҳор этишлари керак”, дейди у.

Эслатиб ўтамиз, аввалроқ Дональд Трамп Хитой, Франция, Япония, Жанубий Корея, Буюк Британия ва бир қатор бошқа давлатларга Ҳормуз бўғозига ҳарбий-денгиз кучларини юбориш таклифи билан чиққан эди. Бироқ Германия ва Франция Трампнинг бу илтимосини бажаришдан бош тортди. Европа Иттифоқи ташқи сиёсат маҳкамасининг юқори мартабали вакили Кая Каллас ЕИ давлатлари Ҳормуз бўғозидаги операция учун ўз флотини тақдим этишга тайёр эмаслигини таъкидлади.

Бунинг ортидан Дональд Трамп НАТО давлатларини Эронга қарши урушда иштирок этишни истамаётгани учун танқид қилди.

АҚШ ва Исроил 28 февралдан бошлаб Эрон ҳудудида жойлашган объектларга зарба беришни бошлади. Бунга жавобан Эрон Исроил ҳудудига, шунингдек, Яқин Шарқ минтақасидаги Америка ҳарбий объектларига зарбалар бермоқда.