Ҳаж зиёрати чоғида 500 дан ортиқ одам вафот этди

Жорий йилнинг 14-19 июнь кунлари Саудия Арабистонида бўлиб ўтаётган “Ҳаж-2024” ибодати вақтида жазирама туфайли 500 дан ортиқ зиёратчи вафот этди. Бу ҳақда араб дипломатларига таяниб “Reuters" нашри хабар берди.

Қайд этилишича, ҳалок бўлганларнинг 323 нафари Миср фуқаролари, 60 нафардан зиёд зиёратчи иорданиялик бўлган. Манбаларга кўра, уларнинг барчаси кичик тиқилинч пайтида иссиқлик билан боғлиқ сабаблардан вафот этган.

“Рўйхатга олинмаган зиёратчилар Миср зиёрат лагерларида катта тартибсизликларни келтириб чиқарди”, дейди Мисрдаги Ҳаж миссиясини назорат қилувчи расмий. 

Унинг қўшимча қилишича, одамлар узоқ вақт давомида озиқ-овқат, сув ва кондиционерсиз қолган.

Саудия Соғлиқни сақлаш вазирлигининг маълумотларига кўра, биргина 16 июнь куни 2764 зиёратчи иссиқ уришидан азият чеккан.

Маълумот учун, AccuWeather об-ҳаво мониторинги сайти маълумотларига кўра, 17 июнь куни Маккада ҳаво ҳарорати 45 даражага етиб, шу кунда Саудия Арабистонидаги энг катта масжидда +52 қайд этилган.