“Ҳаммаси бир кунда портлайди”. Трамп Эронга жиддий таҳдид йўллади

АҚШ Президенти Дональд Трамп Ҳормуз бўғози очилмаса, Эрондаги электр станциялари ва кўприкларни вайрон қилиш билан таҳдид қилди. Бу ҳақда у “Truth Social” ижтимоий тармоғида пост жойлади.

Трамп Эрон расмийларини куракда турмайдиган сўзлар билан ҳақоратлаб, дарҳол бўғозни очишга чақирган. 

“7 апрель – Эронда электр станциялари ва кўприклар куни бўлади. Барчаси бир вақтнинг ўзида портлайди. Бундай нарса ҳали ҳеч қачон бўлмаган!!! Бўғозни очинг, лаънати телбалар, акс ҳолда жаҳаннамга равона бўласиз, фақат кутинг!”, дея ўдағайлаган Оқ уй раҳбари. 

Шу билан бирга, “Fox News” нашрига берган интервьюсида Трамп Эрон билан келишувга эришиш учун “яхши имкониятлар” борлигини айтган. 

“Менимча, яхши имконият бор, ҳозир музокаралар олиб борилмоқда. Агар улар келишувга эришмаса, мен ҳаммасини портлатиб юбориш ва нефтни эгаллаб олиш вариантини кўриб чиқяпман”, деган Трамп. 

Президентнинг таҳдидларига жавобан Эрон парламенти спикери Муҳаммад Бағир Ғолибоф АҚШ Президентининг “ўйламасдан қилинаётган ҳаракатлари” бутун минтақани олов ичига ташлашини айтган. 

“Сен ўйламасдан қилаётган ҳаракатлар АҚШнинг ҳар бир оиласини ҳақиқий жаҳаннамга тортмоқда ва бутун минтақа олов ичида қолмоқда, чунки сен Биньямин Нетаньяху кўрсатмаларига амал қилишда давом этяпсан”, дея ижтимоий тармоқларида ёзиб қолдирган Эрон вакили. 

Эслатиб ўтамиз, аввалроқ АҚШ Президенти Дональд Трамп Эронга Ҳормуз бўғозини очиш бўйича қўйилган ультиматум муддати тугаб бораётганини маълум қилганди. У Эрон расмийларини қўрқитиб, агар бўғоз очилмаса, мамлакат устида “дўзах” ёғилишини иддао қилганди. Теҳрон эса бу талабни рад этиб, АҚШ Президентининг ўзини “жаҳаннам қаърига юбориш” билан таҳдид қилганди.