Трамп Эроннинг 48 соат вақти қолганини айтди

АҚШ Президенти Дональд Трамп Эронга Ҳормуз бўғозини очиш бўйича қўйилган ультиматум муддати тугаб бораётганини маълум қилди. Бу ҳақда у ўзининг Truth Social тармоғидаги саҳифасида ёзди.

“Эронга келишув тузиш ёки Ҳормуз бўғизини очиш учун ўн кун вақт берганимни эсланг. Вақт тугамоқда – уларга бутун дўзах азоби ёғилишига 48 соат қолди”, деб ёзди Америка етакчиси.

Эслатиб ўтамиз, аввалроқ АҚШ Президенти Эроннинг энергия объектларига зарба беришни аввал беш, кейин эса ўн кунга вақтинча чеклаганини айтган эди. Ўн кунлик муҳлат икки кундан кейин – 6 апрель куни тугайди. Трампнинг сўзларига кўра, у Теҳрон билан конструктив музокаралар фонида шундай қарорга келган. Шу билан бирга, Эрон расмийлари тўғридан тўғри музокаралар бўлаётганини инкор этмоқда. 

Зарбаларни қисман чеклашдан олдин Трамп Эронга ультиматум қўйиб, агар Теҳрон 48 соат ичида Ҳормуз бўғозини очмаса, мамлакатдаги барча электр станцияларини йўқ қилиш билан таҳдид қилган эди. Эрон расмийлари бунга жавобан АҚШнинг Форс кўрфази мамлакатларидаги энергетика инфратузилмасини йўқ қилишга, шунингдек, Ҳормуз бўғозини тўлиқ ёпиб қўйишга ваъда берди.

Трамп 2 апрель куни ўз таҳдидларини такрорлади. Унинг таъкидлашича, агар Эрон келишувга рози бўлмаса, АҚШ “уларнинг ҳар бир электр станциясига жуда кучли ва эҳтимол бир вақтнинг ўзида зарба беради”.

Март ойи охирида Трамп Эрон билан музокараларда жиддий прогрессга эришилганини ёзган эди. Ўшанда у Вашингтон “янги, анча оқилона режим” билан музокара олиб бораётганини қайд этганди. Президент, шунингдек, Теҳрон АҚШнинг 15 банддан иборат тинчлик режасининг аксариятига рози бўлганини айтганди.

“Bloomberg” хабарига кўра, АҚШ таклифи 12 та талабни ўз ичига олади, жумладан, Эроннинг уранни бойитишдан воз кечиши, қуролли прокси-гуруҳларни қўллаб-қувватлашни тўхтатиши ва Ҳормуз бўғозини очиши. Бунинг эвазига Вашингтон учта ташаббусни таклиф қилмоқда, улар орасида санкцияларни бекор қилиш ва фуқаролик ядро энергетикасини ривожлантиришга кўмаклашиш бор. “Reuters” манбасининг аниқлик киритишича, Эрон мулозимлари бу режани “бир томонлама” ва муваффақият учун минимал шартларга эга эмас деб ҳисоблаган.

Бироқ апрель ойи бошида Эроннинг “Fars” агентлиги маълумотли манбага таяниб, Эрон АҚШнинг 48 соатлик ўт очишни тўхтатиш ҳақидаги таклифини рад этганини хабар қилди. Покистондаги музокарачилар учрашуви ҳам натижа бермаган, чунки Эрон раҳбарияти Вашингтон билан мулоқотга интилмаяпти.

“The Wall Street Journal” (WSJ) ёзишича, минтақа давлатларининг Покистон бошчилигида АҚШ ва Эрон ўртасида ўт очишни тўхтатишга эришиш борасидаги ҳозирги саъй-ҳаракатлари боши берк кўчага кириб қолган. Теҳрон яқин кунларда Исломободда Америка расмийлари билан учрашишни истамаяпти ва АҚШ талабларини қабул қилиб бўлмас деб атамоқда.