ҲАМАС Исроил асирларини ўлдириш билан таҳдид қилди

ҲАМАС ҳаракати агар Исроил Ғазо секторида жангларни давом эттирса, баъзи гаровга олинганларни ўлдириш билан таҳдид қилмоқда. Бу ҳақда гуруҳ ҳарбий қаноти вакили Абу Убайда жорий йилнинг 6 март куни Исроил армиясига йўллаган видеомурожаатида сўз очган.

“Бизда гаровга олинганларнинг шу кунгача тирик экани ҳақида ҳужжатли далиллар бор. Эртага ёки келажакда бу ўзгариши мумкин. Бу яна уруш бўлишини англатади, улар омон қолмайди. Ҳар қандай кескинлашув гаровдагиларнинг ўлимига олиб келади”, деган гуруҳ аъзоси.

Шунингдек, гуруҳ вакили Исроил “янги ҳужум учун Америка ҳомийлигини таъминлашга интилиб, келишувни амалга оширишдан қочишга ҳаракат қилаётганини” айтган. 

Исроилнинг 9-канали ҲАМАС гаровга олинганларнинг қариндошлари ва мухолифатдаги исроилликларга нисбатан босим тактикасини биринчи марта қўлламаётганини таъкидлаган. 

Маълумот учун, гаровга олинганларни озод қилиш бўйича келишувнинг илк босқичи 27 февраль куни ўз ниҳоясига етганди.

Эслатиб ўтамиз, аввалроқ Исроил гаровга олинганлар бўйича келишувнинг иккинчи босқичига ўтишдан бош тортганди. Фаластин томони музокаралар муваффақиятсизликка учрагани ва воситачилар Исроилни иккинчи босқичга ўтишга кўндира олмаганини маълум қилган. Исроил тўлиқ келишув пакети доирасидан ташқари ҳеч қандай маҳбусни топширмаслигини таъкидлаган.