Ҳалима Ёқуб бу йилги сайловларда қатнашмаслигини эълон қилди

Сингапур Президенти Ҳалима Ёқуб бугун, 29 май куни бу йилги президентлик сайловларида иккинчи муддатга номзодини қўймаслигини маълум қилди. Бу ҳақда у ўз видеобаёнотида айтган.

“Қадрли сингапурликлар, бир неча ойдан сўнг президентлик сайлови бўлиб ўтади, жуда пухта ўйлаб кўриб, қайта сайланмасликка қарор қилдим. Сўнгги олти йил давомида Сингапурнинг саккизинчи Президенти сифатида хизмат қилиш катта шараф ва обрў бўлди. Тажриба энг илҳомлантирувчи ва айни пайтда камтарин бўлди”, деган у ўз баёнотида.

Шунингдек, 68 ёшли раҳбар 2017 йилда лавозимга киришганида президентлик “буюк масъулият” эканини билгани, аммо у ўз вазифасини сидқидилдан бажаришга ҳаракат қилганини қўшимча қилди.

“Мен вазифамни бажариш учун қўлимдан келганча ҳаракат қилдим. Менинг мақсадим янада ғамхўр ва раҳмдил жамиятни тузишга ёрдам бериш эди. Мен бу йўлда ҳеч қачон ёлғиз бўлмаганимдан хурсандман. Бу эътиқодга қатъий шерик бўлган кўплаб сингапурликлар мени қўллаб-қувватладилар. Биргаликда ишлаш орқали биз ҳамжамиятимизнинг овозини кучайтирдик ва энг кўп муҳтож бўлганларни, айниқса, кам таъминланган ва ҳимоясиз одамларни кўтардик”, деган Ҳалима Ёқуб.

Ҳалима хонимнинг айтишича, президентлик Сингапурдаги энг юқори лавозим ва унинг демократиясидаги асосий институтдир. Шу сабабли Президент халқ бошчиси сифатида умумий қадриятлар ва интилишларни ўзида мужассамлаштирган ҳолда халқини бирлаштириши даркор.

“Президент муҳим конституциявий, жамият билан боғлиқ юқори вазифаларга эга бўлиб, бизнинг захираларимиз ва давлат хизматидаги асосий тайинловларнинг иккинчи калитидир. Президентликнинг Сингапур келажагини ҳимоя қилиш учун ҳукумат билан яқиндан ҳамкорликда ишлаётган бирлаштирувчи роли ҳар доим халқимиз муваффақияти учун муҳим бўлиб келган ва биз нотинч ҳамда ноаниқ дунёда йўлимизни топаётганимиз – бу ҳар доимгидан ҳам муҳимроқ бўлади”, дея қўшимча қилди у.

Қолаверса, у Сингапур Президенти сифатида ишлаган пайтлари ирқи, тили ва ижтимоий мавқеидан қатъий назар, барча сингапурликларга хизмат қилиш имкониятига эга бўлганидан миннатдор эканини айтди.

“Менинг фаолиятим давомида кўрсатган ишонч, тушуниш ва меҳр-оқибат учун барча сингапурликларга ҳамда мени яхшироқ Сингапур қуришга ишончи ва иштиёқи билан илҳомлантирган кўплаб жамоат, ижтимоий ва бизнес ташкилотларига миннатдорчилик билдираман. Булар мени қўлимдан келганча жамиятимиз ва миллатимизга бошқа йўллар билан ҳисса қўшишда давом этишимга илҳомлантиради. Шунингдек, мен президентлигим давомида тинимсиз қўллаб-қувватлаган эрим ва оиламга миннатдорчилик билдирмоқчиман”, деди у учрашган одамларнинг ёқимли хотиралари ва ўз фаолияти давомида тўплаган тажрибаларини абадий асраб қолишига ишонтириб. 

Эслатиб ўтамиз, Ҳалима Ёқубнинг ваколат муддати шу йилнинг 13 сентябрида тугайди. Шу сабабли президентлик сайловлари 14 июндан 13 сентабргача ўтказилиши режалаштирилган.

2017 йилги сайловда фақат малай халқи вакиллари иштирок этиши мумкин эди. Аммо навбатдаги президентлик сайловлари барча ирқдаги номзодлар учун очиқ бўлади.