“Зомби пойгаси”. АҚШ Атлантика океанида яна 4 та танкерни қувишни бошлади

Венесуэладан қочаётган “соя флоти”га мансуб танкерлар АҚШ ҳарбий кемаларидан яшириниш учун байроқларини Россияники билан алмаштирмоқда. Бироқ бу уриниш Мурманск томонга яширинмоқчи бўлган кемани қутқара олмаган – америкаликлар уни қўлга олган. Бу ҳақда “The New York Times” хабар берди.

Нашрнинг ёзишича, АҚШ Ҳарбий-денгиз кучлари эсминеци ҳафта бошида Венесуэла сувларини тарк этган ва ҳозир Атлантика орқали Африка ҳамда Европа томонга шошилаётган тўртта нефть танкерини қувиб бормоқда. Нашр бу ҳақда сунъий йўлдош тасвирлари ва америкалик ҳарбий амалдор баёнотига таяниб хабар қилган. Мазкур танкерлар Венесуэланинг денгиз блокадасини ёриб ўтишга уринган 16 та кемадан иборат гуруҳнинг бир қисми бўлиб, улар портлардан бир вақтнинг ўзида турли йўналишларда чиқиб кетишга ҳаракат қилган. Ҳозирча АҚШ фақат битта танкерни тўхтата олган: жорий йилнинг 7 январь куни Кариб денгизида америкалик ҳарбийлар M Sophia танкерининг бортига чиққан.

Бўш ҳолатда кетаётган Veronica номли танкер шу ҳафта ўз номини Galileo’га ўзгартирган ва байроғини Россияники билан алмаштирган – бу АҚШ Ҳарбий-денгиз кучлари томонидан қўлга олинмасликка қаратилган уриниш бўлгани. NYT Россия денгиз реестри маълумотларини таҳлил қилиб аниқлашича, Венесуэла нефтини ташиётган ва Россия ҳамда Эрон хомашёсини ташигани учун АҚШ санкцияларига тушган яна учта танкер ҳам худди шундай йўл тутган: улар Сочи ёки Таганрогда рўйхатдан ўтган.

“Танкерларнинг Венесуэладан бир вақтнинг ўзида оммавий чиқиб кетиши АҚШда уларнинг барчасини бирваракайига тўхтатиш учун етарли ҳуқуқий ваколат ёки куч бўлмаслиги ҳисобга олинган ҳолда ташкил этилган. Аслида бу зомби пойгаси – шунчаки ортингдан келаётган кемадан тезроқ бўлишинг керак”, дейди АҚШ Молия вазирлигида илгари санкциялар ижроси учун масъул бўлган Дэвид Танненбаум.

Bella 1 танкерини Россия байроғига ўтиш ҳам қутқара олмаган. У икки ҳафтадан кўпроқ вақт аввал Венесуэлани тарк этишга уринган. Дастлаб у АҚШ Соҳил қўриқлаш хизмати аскарларининг бортга чиқишига йўл қўймаган, бироқ узоқ қувишдан сўнг Исландия ва Шотландия оралиғидаги сувларда барибир қўлга олинган. Атлантика океани орқали ҳаракатланар экан, АҚШ санкциялари остидаги танкер ўз номини Marinera’га, рўйхатини эса Россияники қилиб ўзгартирган, экипаж эса ҳатто бортига Россия байроғини чизиб қўйган. Москва унга қарши сувости кемасини йўллаган ва АҚШдан таъқибни тўхтатишни расман сўраган. Бироқ америкаликлар Европадаги авиабазалардан учган самолётлар ҳамда Британиянинг сувости кемаларига қарши самолёти кўмагида танкерни қўлга олган. Америкалик ҳарбий амалдорлар NYT’га санкция остидаги кемаларнинг яна қўлга олиниши кутилаётганини айтган.

“Bloomberg”нинг ёзишича, АҚШ ҳаракатлари ва блокада туфайли денгизда турган танкерлар бортидаги Венесуэла нефть ҳажми ҳафта бошидан бери 20 миллион барреллдан 29 миллион баррелдан ошган. Бу сўнгги уч йилдан ортиқ вақтдаги энг юқори кўрсаткич.

Эслатиб ўтамиз, аввалроқ Қўшма Штатлар томонидан Атлантика океанида қўлга олинган Россия байроғи остидаги нефть танкеридан икки нафар россиялик экипаж аъзосини озод қилингани ҳақида хабар берилган эди.