АҚШ қўлга олган танкердан россияликлар озод қилинди

Қўшма Штатлар томонидан Атлантика океанида қўлга олинган Россия байроғи остидаги нефть танкеридан икки нафар россиялик экипаж аъзосини озод қилинди. Бу ҳақда бугун, 9 январь куни Россия Ташқи ишлар вазирлиги хабар берди.  

Келтирилишича, вазирлик вакили Мария Захарова баёнотида россияликларни озод қилгани учун АҚШни олқишлаб, унга миннатдорлик билдирган. 

“Биз ушбу қарорни олқишлаймиз ва АҚШ раҳбариятига миннатдорлик билдирамиз. Биз ватандошларимизнинг ўз ватанларига тезроқ қайтишини таъминлаш билан боғлиқ барча масалалар бўйича шошилинч амалий ишларни давом эттирмоқдамиз”, дейди у.

Шунингдек, Россия махсус элчиси Кирилл Дмитриeв ҳам АҚШ Президенти Дональд Трамп “Marinera” танкеридаги “барча россияликларни” қўйиб юборишга қарор қилганини билдирган.

Маълумот ўрнида, бунгача Қўшма Штатлар расмийлари “Marinera” экипажи судга тортилиши мумкинлигини айтган эди, бу эса Россия томонидан “мутлақо қабул қилиб бўлмайдиган” ҳолат деб баҳоланган. Москва Вашингтонни ноқонуний деб ҳисоблаган танкерни мусодара қилиш билан кескинликни кучайтиришда ва халқаро юк ташишга таҳдид солишда айблаганди.

Россия Ташқи ишлар вазирлиги бу ҳаракат “фақат ҳарбий ва сиёсий кескинликларни янада кучайтиради” деб таъкидлаб, “Вашингтоннинг кескин халқаро инқирозли вазиятларни келтириб чиқаришга тайёрлиги”дан хавотирда эканлигини қўшимча қилган.

Эслатиб ўтамиз, аввалроқ АҚШ Венесуэлага алоқаси бўлган “Marinera” нефть танкерининг қўлга олинганини эълон қилганди. Ушбу танкер Атлантика океани бўйлаб икки ҳафтадан ортиқ давом этган қидирувдан сўнг номини ўзгартирган ва Россия байроғи билан ниқобланган.

Кейинроқ, Дональд Трамп “Fox News” телеканалига берган интервьюсида  Marinera’дан ёнилғи туширилаётганини айтди. АҚШ раҳбари ушбу воқеадан сўнг Россия Президенти Владимир Путин билан гаплашган ё гаплаша олмаганига доир саволга жавоб беришдан бош тортиб, бу ҳақда гапиришни истамаслигини айтган.