АҚШ бир кунда Венесуэла нефтидан 4 млрд доллар даромад олди – Трамп

АҚШ Президенти Дональд Трамп Вашингтон Венесуэла нефтини сотиш орқали миллиардлаб, эҳтимол триллионлаб доллар ишлаб олишни режалаштираётганини маълум қилди. Бу ҳақда у “Fox News” телеканалига берган интервьюсида гапирди.

“Гап нефтдан олинадиган миллиардлаб долларлар ҳақида кетмоқда, вақт ўтиб бу маблағлар юзлаб миллиардларга, кейин эса триллионларга айланади. Мамлакат (Венесуэла) тартибга келтирилмагунча, биз у ерда бўламиз”, дейди Оқ уй раҳбари.

Унинг қўшимча қилишича, АҚШ бир кун ичида Венесуэла нефтидан жами 4 миллиард доллар миқдорида даромад олган ва “бу кўрсаткич ошиб боради”.

Трампнинг айтишича, ҳозирда ёнилғи 6 январь куни Америка кучлари назоратига ўтган Marinera номли танкердан туширилмоқда. АҚШ раҳбари ушбу воқеадан сўнг Россия Президенти Владимир Путин билан гаплашган ё гаплаша олмаганига доир саволга жавоб беришдан бош тортиб, бу ҳақда гапиришни истамаслигини айтган.

Эслатиб ўтамиз, жорий 3 январга ўтар кечаси Венесуэла пойтахтида бир нечта портлашлар содир бўлганди. Маълум бўлишича, АҚШ Ҳарбий-ҳаво кучлари махсус операция ўтказиб, президент Николас Мадурони ва унинг рафиқасини қўлга олиб, мажбуран олиб чиқиб кетган. Улар Нью-Йоркдаги қамоқхоналардан бирига жойлаштирилган.  

Венесуэланинг собиқ раҳбарига АҚШда террорчи ташкилот деб эълон қилинган Cartel de los Soles жиноий гуруҳига бошчилик қилганлик, шунингдек, рафиқаси, ўғли ва энг яқин сафдошлари билан бирга кокаин ишлаб чиқариш ва ташиш билан шуғулланувчи колумбиялик гуруҳлар билан тил бириктирганлик айбловлари қўйилган.

Бундан ташқари, Николас Мадурони венесуэлалик дипломатик паспортлар савдоси, наркотик савдосига дипломатик ҳимоя яратиш ҳамда рақибларни йўқ қилиш учун жиноий гуруҳларни қўллашда ҳам айблашмоқда.