Зироат Мирзиёева “Фаластин учун ягона юрак” саммитида қатнашди

Бугун, 15 ноябрь куни Туркиянинг Истанбул шаҳридаги Долмабоғча президентлик мажмуасида Туркия биринчи хоними Эмина Эрдўған томонидан ташкил этилган "Фаластин учун ягона юрак" саммити бўлиб ўтди. Унда Ўзбекистон Республикасининг биринчи хоними Зироат Мирзиёева ҳам иштирок этиб, нутқ сўзлади. 

Саммитда Қатар амири Шайх Тамим бин Ҳамад Ол Сонийнинг онаси Шайха Моза бинт Носир, Сенегал Президенти Маки Санинг рафиқаси Мариеме Файе Салл, Малайзия қироличаси Тунку Азиза Аминаҳ Маймунаҳ Искандария, Ўзбекистон Президентининг рафиқаси Зироат Мирзиёева, Конго Республикаси Президентининг рафиқаси Антуанетта Сассу-Нгессо, Бангладеш Президентининг рафиқаси Ребека Султона, Босния и Герцеговина Президентлик кенгашининг хорват аъзоси Желько Комшичнинг рафиқаси Сабина Комшич, Ливан Бош вазирининг рафиқаси Май Микати, Шотландия минтақавий бош вазири Ҳамза Юсуфнинг рафиқаси Надия Ал-Накла, Ливия Бош вазири Абдулҳамид Дибейбенинг рафиқаси Омина Али Муҳаммад Ал-Шавуш Ал-Дилавий, Фаластин махсус вакили Фериал Камел Абдалраҳмон Салим, Бирлашган Араб Амирликлари Ташқи ишлар вазири Абдулла бин Зоид ан-Наҳённинг рафиқаси Шайха Алязиа бинт Саиф Ал Наҳаён, Миср режалаштириш ва иқтисодий ривожланиш вазири Ҳала Алсаид ва туркманистонлик дипломат Чинор Рустамова иштирок этди. 

Учрашувга Озарбайжон Президенти Илҳом Алиевнинг рафиқаси Миҳрибан Алиева, Бразилия Президенти Луис Инасиу Лула да Силванинг рафиқаси Росангела да Силва ва Венесуэла Президенти Николас Мадуронинг рафиқаси Силия Флорес ҳам видеомурожаат йўллади. 

Биринчи хоним Эрдўған, Долмабоғча идорасига бирин-кетин келган меҳмонларни эшик олдида кутиб олди. Сўнгра биринчи хоним Эрдўған ва меҳмонлар оилавий биргаликда суратга тушди.  

Эслатиб ўтамиз, Ўзбекистон Президентининг рафиқаси Зироат Мирзиёев Эмина Эрдўғаннинг таклифига биноан Туркияга кеча, 14 ноябрь куни етиб борди. Унга кенжа қизи – Ижтимоий ҳимоя агентлиги директорининг биринчи ўринбосари Шаҳноза Мирзиёева ҳамроҳлик қилмоқда.