Жўраевлар иши: ДНК экспертизаси натижаси эълон қилиниши мумкин

Хабарингиз бор, бир неча ойдан буён Фуқаролик ишлари бўйича Учтепа туманлараро судида Жўраевлар иши кўриб чиқилмоқда. Эртага, 21 август куни ушбу иш доирасида навбатдаги суд мажлиси бўлиб ўтади. Бу ҳақда QALAMPIR.UZ манбаси хабар берди.  

Жорий йилнинг 2 май куни бўлиб ўтган суд мажлисида даъвогар вакили Ботир Қодиров ҳақиқатдан ҳам марҳум санъаткор Ўзбекистон Республикаси Халқ артисти Шерали Жўраевнинг ўғли эканини аниқлаш мақсадида ДНК экспертизаси ўтказишни сўраб судга илтимоснома билан мурожаат қилган эди. Мазкур сўровга асосан судья номаълум муддатга суд мажлисини қолдирган.

Орадан 3 ойдан ортиқ вақт ўтиб, суд мажлиси 21 августга белгиланди. Таҳририятга маълум бўлишича, галдаги ёпиқ суд мажлисида суд томонидан тайинланган ДНК экспертизаси натижаси эълон қилиниши мумкин. Суд якуний қарорни қачон эълон қилиши ҳозирча маълум эмас.

Жўраевлар иши

Ботир Қодиров шу йилнинг февраль ойи бошларида онасининг шаъни, ор-номуси ва ўзининг қадр-қимматини ҳимоя қилиш мақсадида оталик фактини белгилаш учун даъво аризаси билан судга мурожаат қилган.

Мазкур иш 15 апрель куни фуқаролик ишлари бўйича Учтепа туманлараро судида судья Ўтанбоева томонидан кўриб чиқилиши белгиланган. Бироқ жавобгар (Зоҳиршоҳ Жўраев) вакили иш билан танишиш учун судни бошқа кунга қолдиришни сўраган. Биринчи суд мажлиси 23 апрель куни бўлиб ўтди. Билдирилишича, суд мажлисида даъвогар вакилининг кўрсатмаси эшитилиб, гувоҳларни ишга жалб этиш ва қўшимча далилларни талаб қилиб олиш учун ишни кўриш яна 2 майга қолдирилган. 

Даъво аризасига Ўзбекистон Республикаси Адлия вазирлиги ҳузуридаги Сулаймонова номидаги Республика суд-экспертиза марказининг 2023 йил 29 сентябрдаги мутахассис фикри илова қилинган. Унда Ҳалимжон Нурматов билан Ботир Шералиевич Қодировнинг амаки-жиян эканлиги бўйича фикр берилган.

Ботир Қодировнинг ўзи Жўраевларни судга берганига Шерали Жўраевнинг тўнғич ўғли Шоҳжаҳон Жўраевнинг ижтимоий тармоқдаги саҳифасига уни ҳақоратлаб қўйган пости сабаб бўлганини айтди. 

Гап шундаки, хонанда Шоҳжаҳон Жўраев ўзининг Instagram саҳифасида Ботир Қодировга тегиштириб, ноўрин сўзларни ёзган. Қодировнинг продюсери Асрор Исохўжаевнинг сўзларига кўра, айнан шу пост сабабли қўшиқчи марҳум санъаткор Шерали Жўраев оиласини судга беришга мажбур бўлган. 

QALAMPIR.UZ ушбу мавзуга ойдинлик киритиш мақсадида Шерали Жўраевнинг укаси Ҳалимжон Нурматов билан боғланди. Буни қарангки, у Ботир Қодиров билан амаки-жиян эканини аниқлаш учун ДНК текшируви ўтказилганини рад этганди.

Хонанда Ботир Қодиров QALAMPIR.UZ’га берган интервьюсида барча саволларга жавоб бериб, Шерали Жўраев шубҳасиз унинг отаси экани, хонанда 20 ёшга тўлгунга қадар ота-бола жуда кўп борди-келди қилиб тургани, онасига бўлган тазйиқлар, унда оталик фактини исботловчи барча далиллар борлигини айтди.