ЖССТ ҳантавирус ҳақида янги маълумот эълон қилди

Генетик таҳлиллар ва аввалги намуналар билан солиштиришларда ҳозирча ҳантавируснинг осонроқ юқа бошлагани ёки касалликнинг янада оғирроқ кечишига сабаб бўлаётгани белгилари аниқланмади. Бу ҳақда Жаҳон соғлиқни сақлаш ташкилоти (ЖССТ) эксперти Мария Ван Керкхове маълум қилди. 

ЖССТ маълумотларига кўра, Hondius MV круиз кемасига ҳантавируснинг Жанубий Америкага хос бўлган варианти – “Андес” штамми олиб кирилган. У одатда тўғридан тўғри кемирувчилардан, масалан, чанг таркибидаги тезак заррачалари орқали юқади. Ташкилотнинг тахмин қилишича, биринчи бемор нидерландиялик йўловчи бўлиб, у Аргентинада кемага чиқишдан аввал, Жанубий Американинг қуруқликдаги ҳудудида юқтириб олган. Дастлабки маълумотларга кўра, у круиздан олдин қушларни кузатиш жараёнида кемирувчилар билан алоқада бўлган бўлиши мумкин.

Генетик таҳлил шуни кўрсатдики, қолган касалланиш ҳолатлари, эҳтимол, одамдан одамга юқиш орқали содир бўлган. Нидерландиялик фуқаро ва унинг рафиқаси вафот этган, шунингдек, Hondius MV кемасининг Германиядан бўлган яна бир йўловчи аёли ҳам ҳаётдан кўз юмган. Жами 10 киши вирусни юқтирган бўлиб, улардан 8 та ҳолат лаборатория шароитида тасдиқланган. Кемада 150 га яқин киши бўлган, улар ҳозирда карантинга олинган, касалликнинг яширин даври 40 кундан ортиқ давом этиши мумкин.

“Кўрилган чора-тадбирлар туфайли ушбу касаллик тарқалиши тез орада бартараф этилиши эҳтимоли жуда юқори. Бунинг устига, кемадаги барча туристлар соғлиқни сақлаш тизими ривожланган саноатлашган давлатлардан. Ҳозирда уларнинг барча алоқалари аниқланиб, карантин чоралари кўрилмоқда. Шу сабабли, мен ушбу авж олиш тўхтатилишини тахмин қиляпман”, дейди Галвестондаги Техас университети тиббиёт бўлими вирусологи Александр Букреев.

Эслатиб ўтамиз, аввалроқ Ўзбекистонда ҳантавирус билан касалланиш ҳолатлари қайд этилмагани ҳақида хабар берилган эди.