Жонсон “Толибон” ҳокимиятини тан олиш шартини айтди

Ғарб давлатлари “Толибон” ҳокимиятини дипломатик равишда тан олиниши мумкин, бироқ бунинг учун ҳаракат бир неча шартларни бажариши керак. Буюк Британия Бош вазири Борис Жонсон толибларнинг Афғонистондаги ҳукмронлиги ҳақида гапириб, шундай фикр билдирди.

“Агарда Қобулдаги ҳаракат янги тартиб тан олинишини ёки музлатилган миллиардлар блокдан чиқарилишини истаса, Афғонистонни тарк этмоқчи бўлганлар хавфсизлигини таъминлаши керак. Шунингдек, аёллар ва қизлар ҳуқуқини ҳурмат қилиши ва Афғонистонни глобал терроризм инкубатори бўлишига йўл қўймаслиги зарур, чунки бу мамлакат учун даҳшатли бўлади”, дейди Жонсон.

Бош вазирнинг сўзларига кўра, Британиянинг иттифоқдошлари Америка, Европа ва бутун дунё “Толибон”нинг айтганлари эмас, балки қилган ишларига асосан у билан ҳамкорлик қилади.

Маълумот учун, жорий йилнинг май ойида АҚШ бошлиқ халқаро коалиция кучлари Афғонистонни тарк этишни бошлаши билан “Толибон” ҳаракати ҳукумат назоратидаги ҳудудларни эгаллаб ола бошлади. Август ойига келиб, толиблар йирик шаҳарларга юриш бошлади.

Орадан кўп ўтмай, жорий йилнинг 15 август куни Қобулнинг “Толибон” қўлига ўтиши билан Афғонистонда ҳаракат ҳокимияти ўрнатилди. Президент Ашраф Ғани эса истеъфо берганини ҳамда мамлакатни тарк этганини маълум қилди. Ҳокимиятни “Толибон”га ўтишини таъминлаш учун Мувофиқлаштириш кенгаши тузилиб, унга Абдулла Абдулла ва Ҳамид Карзай киритилганди.

Жорий йилнинг 19 август куни эса ҳаракат расмий баёнот билан чиқиб, мамлакатда Ислом Амирлиги тузилганини  эълон қилди. "Толибон" вакили Воҳидулла Ҳошимий ҳаракат Афғонистонда демократик давлат қурмаслигини маълум қилди.

Ҳозирда фақатгина Панжшер вилояти толиблар ҳокимиятини тан олмаяпти. Вилоятда “Толибон”га қарши кучлар йиғилмоқда. Уларга эса машҳур "дала қўмондони" Аҳмад Шоҳ Масъуднинг ўғли Аҳмад Масъуд бошчилик қиляпти.