Зеленский Путиннинг тинчлик меморандуми ҳақидаги баёнотига жавоб берди

Аввалроқ, Россия Президенти Владимир Путин АҚШ Президенти Дональд Трамп билан телефон орқали суҳбатдан сўнг Украина билан келажакдаги тинчлик шартномаси бўйича меморандум устида ишлашга тайёрлиги ҳақида эълон қилганди. Украина Президенти Владимир Зеленский Путиннинг ушбу баёнотига изоҳ берди.

Зеленский ҳам ўз навбатида Украина томони бу ҳужжат устида иш бошлашга тайёрлигини билдирди, бироқ бунинг учун аввал Россия томони расмий таклиф юбориши кераклигини таъкидлади.

“Мен сизга меморандумга нималар киритилиши ҳақида жавоб бера олмайман, чунки ҳозирча бундай маълумотга эга эмасман. Менинг принципларим эса Президент Трампга маълум бўлган принциплар”, деди Зеленский.

Шу билан бирга, у Украина ҳарбийлари Россия томонидан эгалланган ҳудудлардан олиб чиқилмаслигини қатъий таъкидлади.

“Бу менинг конституциявий бурчим, бу бизнинг ҳарбийларимизнинг мажбурияти – Украина суверенитети ва ҳудудий яхлитлигини ҳимоя қилиш. Ҳа, ҳозирда агрессия натижасида босиб олинган ҳудудлар бор. Аммо ҳеч ким ўз ерини, ўз фуқароларини топширмайди”, дея баён қилди Зеленский.

Унинг айтишича, бу масала Трамп ва унинг жамоаси билан бир неча бор муҳокама қилинган.

“Агар Россия шарт сифатида бизнинг аскарларни ўз еримиздан чиқаришни қўяётган бўлса демак, улар ўт очишни тўхтатишни истамаяпти. Чунки улар жуда яхши билади: Украина бундай қадамни қўймайди”, дея хулоса қилди Украина Президенти.

Эслатиб ўтамиз, аввалроқ Дональд Трамп ва Владимир Путин ўртасида телефон орқали суҳбат бўлиб ўтган эди.  

Путин суҳбат икки соат давом этганини, уни очиқ, мазмунли ва фойдали деб баҳолаганини маълум қилди ҳамда Трампга Россия-Украина ўртасида бевосита музокараларни тиклашдаги иштироки учун миннатдорлик билдирди.

Путин, шунингдек, Россия Украина билан ўт очишни тўхтатишни ўз ичига олган меморандум устида ишлашга тайёрлигини айтган. Унинг фикрича, барча томонлар учун мақбул бўлган муросани топиш лозим.

Кейинчалик Трамп ҳам ушбу суҳбат юзасидан изоҳ бериб, Россия ва Украина зудлик билан ўт очишни тўхтатиш ва урушни якунлаш бўйича музокараларни бошлашини ёзди. У, шунингдек, бу ҳақда Украина Президенти, Еврокомиссия раҳбари ва бошқа Европа етакчиларини хабардор қилганини билдирди.