Путин Трамп билан нимага келишганини айтди (видео)

Кеча, 19 май куни АҚШ Президенти Дональд Трамп Россия етакчиси Владимир Путин билан Украинадаги Россия урушини тартибга солиш масаласида телефон орқали мулоқот қилди. Сочида бўлиб ўтган матбуот брифингида сўзлаган Путин Трамп билан бўлган суҳбатни “очиқ ва мазмунли” деб атади ва Трамп Россиянинг Украинадаги инқирозни тинч йўл билан ҳал қилишга содиқлигини тан олганини таъкидлади.

“Ҳайрли кеч! Ҳамкасбларим АҚШ Президенти билан телефон орқали суҳбатимиз натижалари ҳақида бир неча сўз айтишимни илтимос қилишди. Дарҳақиқат, бу суҳбат бўлиб ўтди ва икки соатдан ортиқ давом этди. Шуни таъкидлашни истардимки, у жуда мазмунли ва очиқ бўлди. Ва умуман олганда, менинг фикримча, бу борада жуда фойдали.

Аввало, мен 2022 йилда Украина томони тўхтатиб қўйган музокараларни қайта тиклаш бўйича Россия ва Украина ўртасида тинчлик битими имзоланиши мумкин бўлган тўғридан тўғри музокараларни қайта тиклашда Қўшма Штатларнинг қўллаб-қувватлагани учун АҚШ Президентига миннатдорлик билдирдим.

АҚШ Президенти ҳарбий ҳаракатларни тўхтатиш, ўт очишни тўхтатиш бўйича ўз позициясини билдирди ва мен ҳам ўз навбатида, Россия ҳам Украина инқирозини тинч йўл билан ҳал этиш тарафдори эканини таъкидладим. Биз шунчаки тинчлик сари энг самарали йўлларни аниқлашимиз керак.

Биз АҚШ Президенти билан Россия Украина томонига бир қатор позицияларни, масалан, келишув тамойиллари, мумкин бўлган тинчлик битимини имзолаш муддати ва ҳоказоларни, шу жумладан тегишли келишувларга эришилса, маълум муддатга ўт очишни тўхтатишни ўз ичига олувчи бир қатор позицияларни белгилаб берувчи келгусида юзага келиши мумкин бўлган тинчлик шартномаси бўйича меморандумни таклиф қилишини ва у билан ишлашга тайёрлигини келишиб олдик.

Айтганча, Истанбулдаги учрашув ва музокаралар иштирокчилари ўртасидаги алоқалар қайта тикланди ва бу биз умуман тўғри йўлдамиз, дейишга асос бўлади.

Яна бир бор таъкидлаб ўтмоқчиманки, суҳбат жуда конструктив тарзда ўтди ва мен буни юксак қадрлайман. Масала шундаки, Россия ва Украина томонлари тинчликка максимал даражада интилишларини намоён этишлари ва барча томонларга мос келадиган муросаларни топишлари керак.

Шу билан бирга, шуни таъкидлашни истардимки, умуман олганда, Россиянинг позицияси аниқ. Биз учун асосийси бу инқирознинг асл сабабларини бартараф этишдир.

Агар бирор нарсага аниқлик киритиш зарурати туғилса, матбуот котиби Песков ва менинг ёрдамчим жаноб Ушаков бироздан кейин телефон орқали президент Трамп билан бугунги музокараларимиз тафсилотларини тушунтириб беришади”, деди Путин.

Трампнинг ўзи эса Truth Social'даги саҳифасида Путин билан суҳбат “жуда яхши” ўтгани ва унинг “оҳанги ва руҳи” “аъло даражада” эканини ёзди. Трамп Россия ва Украина зудлик билан ўт очишни тўхтатиш ва урушни тугатишга олиб келадиган музокараларни бошлашини маълум қилди.

“Шартлар ҳар икки томон томонидан муҳокама қилинади”, деди у.

Бундан ташқари, Трамп Рим папаси Лео XIV вакиллигидаги Ватикан ушбу музокараларда воситачилик қилишдан манфаатдор эканини таъкидлади.

Унинг сўзларига кўра, Россия уруш тугаганидан сўнг АҚШ билан “ҳар томонлама савдо-сотиқ”ни қайта тиклашга интилмоқда ва у бундай режаларга “қўшилади”.

“Россияда жуда кўп иш ўринлари ва бойлик яратиш учун улкан имконият мавжуд. Унинг имкониятлари чексиздир.

Ўз навбатида, Украина савдода, мамлакатни тиклаш жараёнида катта фойда олувчига айланиши мумкин”, деб ишонади Трамп.

Оқ уй раҳбари Путин билан суҳбатдан сўнг Украина Президенти Владимир Зеленский, Еврокомиссия раиси Урсула фон дер Ляйен, Германия канцлери Фридрих Мерц, Франция Президенти Эммануэль Макрон, Италия Бош вазири Жоржия Мелони ва Финляндия Президенти Александр Стуббга ушбу телефон суҳбатининг мазмуни дарҳол маълум қилинганини қўшимча қилди .