Зеленский Польшага ҳам борди

Украина Президенти Владимир Зеленский Брюсселдан кетгач, Польшага борди ва Президент Анжей Дуда билан учрашди. Бу ҳақда Польша Президентининг халқаро масалалар бўйича масъул вакили Маркин Пшидач Twitter’даги саҳифасида маълум қилди.

Қайд этилишича, давлатлар раҳбарлари Европа Иттифоқи саммити натижалари ва бўлажак НАТО саммитини муҳокама қилган. Зеленский Польша Президенти Дудага яқин орадаги дипломатик фаолияти, Брюссел ва Европанинг бошқа пойтахтларида бўлиб ўтган бир қатор учрашувлари ҳақида гапириб берган. Суҳбат чоғида Украина Президенти томонидан режалаштирилаётган дипломатик қадамлар ва Вильнюсдаги бўлажак НАТО саммити кун тартибини шакллантириш масалалари кўриб чиқилган.

“Келгуси ҳафтада Президент Анжей Дуда НАТО Бош котиби билан учрашади, шунинг учун Польша ва Украина Президентлари ўртасида ўтказилган ушбу фаолият доирасидаги фикр ва маълумотлар алмашинуви жуда муҳим эди”, деган Маркин Пшидач.

Шунингдек, Президентлар ҳозирги хавфсизлик ҳолатини, Украинани қўллаб-қувватлаш бўйича келгусида биргаликда амалга ошириладиган зарур саъй-ҳаракатларни муҳокама қилган. Суҳбатда санкциялар мавзуси ҳам кўриб чиқилган. Зеленский Президент Дудага Польшанинг Украинага кўрсатаётган ёрдами, жумладан, миллионлаб украиналик қочқинларга ғамхўрлик қилгани учун миннатдорлик билдирган.

Маълумот учун, келгуси НАТО саммити 2023 йилнинг 11-12 июль кунлари Литва пойтахти Вильнюсда бўлиб ўтади.

Эслатиб ўтамиз, 8 февраль куни Зеленский Буюк Британияга борган, у ерда қирол Чарльз III, Бош вазир Риши Сунак билан учрашган ва Британия Парламентида нутқ сўзлаган эди. Шунингдек, ташриф доирасида Зеленский Британияда тайёргарлик кўраётган Украина ҳарбийлари билан ҳам кўришганди. Британия сафаридан сўнг у Макрон ва Шольц билан учрашиш учун Парижга келган эди. У ерда Президент Макрон уни “Фахрий Легион” ордени билан тақдирлаганди. 9 февраль куни  Зеленскийнинг Европа бўйлаб сафари Брюсселда давом этиб, у ерда Европарламентда чиқиш қилган ва Европа Иттифоқи саммитида иштирок этган эди.

Алибек Бейжанов