Зеленский АҚШ билан металлар бўйича келишувни имзолашдан бош тортди

Германияда давом этаётган Мюнхен хавфсизлик конференциясида кеча, 14 февраль куни Украина Президенти Владимир Зеленский АҚШ билан металлар бўйича келишувни имзолашдан бош тортди. Бу ҳақда “The Washington Post” газетаси шарҳловчиси Жош Рогин Х саҳифасида маълум қилди.

“Бу ерда, Мюнхенда бир нечта қонунчилар менга АҚШ Конгресси делегацияси Зеленскийга ҳужжат топширганини айтишди. Улар уни имзолашини исташган ва бу ҳужжат АҚШга Украинадаги келажакдаги фойдали қазилма захираларининг 50 фоизига эгалик қилиш ҳуқуқини бериши керак эди. Зеленский уни хушмуомалалик билан имзолашдан бош тортди”, деб ёзди Жош Рогин.

Кейинчалик, Рогин ўз маълумотларига аниқлик киритди. Унга кўра, америкалик қонунчилар билан учрашувда Зеленский уларга ушбу ҳужжат ҳақида изоҳ берган. Кўпчилик бу ҳужжат ҳақида ҳали билмаган. Шунинг учун, Зеленский уни имзолай олмаслигини айтган, чунки у Украинага ҳеч қандай хавфсизлик кафолатларини ўз ичига олмайди.

north_east

Зеленский АҚШ вице-президенти билан учрашди

Эслатиб ўтамиз, олдинроқ АҚШ Президенти Дональд Трамп агар АҚШга нодир ер металлар етказиб бериш ваъда қилинса, Украинага ёрдам давом эттирилишини билдирган эди.

Шунингдек, аввалроқ Украина АҚШга минерал ресурсларни етказиб бериш бўйича икки томонлама келишув бўйича таклифларни тақдим этганди. Киев АҚШнинг хавфсизлик кафолатлари доирасида ўз табиий ресурсларини Америка сармояси учун очиш бўйича келишув тузишга тайёрлигини маълум қилган. Хусусан, гап ноёб ер минераллари: титан, уран ва литий ҳақида бормоқда.