Украина АҚШга минерал ресурслар бўйича келишув лойиҳасини топширди

Украина кеча, 14 февраль куни АҚШга минерал ресурсларни етказиб бериш бўйича икки томонлама келишув бўйича таклифларни тақдим этди. Бу ҳақда икки хабардор манбасига таяниб, “Америка овози” хабар берди.

Қайд этилишича, Киев АҚШнинг хавфсизлик кафолатлари доирасида ўз табиий ресурсларини Америка сармояси учун очиш бўйича келишув тузишга тайёрлигини маълум қилган. Хусусан, гап ноёб ер минераллари: титан, уран ва литий ҳақида бормоқда.

Молия вазири Скотт Бессент 12 февраль куни Вашингтонда ишлаб чиқилган келишув лойиҳаси билан Киевга ташриф буюрганди. Зеленский буни Мюнхен хавфсизлик конференциясидаги учрашув олдидан ўрганишини айтган.

Бессент кеча, 14 февраль куни “Fox Business Network” телеканалига берган интервьюсида Трамп маъмуриятининг урушни тугатиш режаси АҚШ ва Украина ўртасидаги иқтисодий ҳамкорликни рағбатлантиришини ва АҚШ ўзининг “хусусийлаштириш бўйича энг яхши амалиётларини” муҳокама қилишини айтган.

“Бунинг бир қисми Украина иқтисодиёти билан Америка иқтисодиёти ўзаро боғланишидан бошланади, шунда америкалик солиқ тўловчилар ўз пулларини олишади”, деган Бессент.

Мюнхенда АҚШ сенаторларидан иборат икки партиявий гуруҳ ва Владимир Зеленский ўртасида бўлиб ўтган учрашувда АҚШ ва Украина ўртасида фойдали қазилмаларни қазиб олиш бўйича келишув масаласи муҳокама қилинган.

Зеленскийнинг таъкидлашича, АҚШга тақдим этилган таклифлар “Украина конституциясига мувофиқ” тузилган.

Ўтган ҳафта Украина Президенти бу табиий ресурсларни биргаликда ўзлаштириш учун ўзаро манфаатли ҳамкорлик эканини таъкидлади.

Эслатиб ўтамиз, аввалроқ Дональд Трамп Россия Федерацияси томонидан ҳарбий тажовузга учраган Украина “бир кун Россияники бўлиб қолиши мумкин”лигини истисно этмаганди. Шунингдек, у Украинанинг табиий ресурслари, хусусан, ноёб тупроқ металлари эвазига Украинага Америка ёрдамини тақдим этиш таклифини такрорлаганди.