Зеленский ҳам G7 саммитига етиб борди
Олам
−
17 Июнь 5550
Украина Президенти Владимир Зеленский Канаданинг Кананаскис шаҳрида бўлиб ўтаётган G7 саммитига ташриф буюрди. Бу ҳақда Украинанинг “Страна” нашри хабар берди.
Журналистларга кўра, Зеленский G7 етакчиларининг “Кучли ва суверен Украина” деб номланган махсус учрашувида иштирок этади. Зеленскийни Канада Бош вазири Марк Карни кутиб олди.
Украина раҳбарининг Франция ва Бразилия Президентлари, Буюк Британия, Ҳиндистон ва Япония Бош вазирлари, шунингдек, Европа Иттифоқи ва НАТОнинг юқори мартабали амалдорлари билан бир қатор учрашувлари режалаштирилган.
Зеленский Рокки тоғларидаги саммитга Оқ уй раҳбари Дональд Трамп эрта жўнаб кетганидан сўнг етиб борди. У Эрон ва Исроил ўртасидаги қуролли можаро давом этаётган Яқин Шарқдаги вазият кескинлашгани сабабли Вашингтонга қайтди. Шундай қилиб, Зеленский ва Трампнинг шахсий учрашуви бўлмайди. Эслатиб ўтамиз, аввалроқ Украина Президенти Трампдан АҚШ яқин келажакда Россияга қарши санкцияларни кучайтириш нияти бор-йўқлиги ҳақида сўрашни, шунингдек, АҚШдан қурол сотиб олиш имкониятларини муҳокама қилишини айтганди.
Трамп йўқлигида Зеленскийнинг Россия билан урушида Украинани қўллаб-қувватлашини билдирган бошқа G7 давлатлари раҳбарлари билан гаплашиши кутилмоқда. Бироқ Украина ҳозир талаб қилаётган Москвага босим ўтказиш бўйича қандайдир аниқ чора-тадбирлар тўғрисида келишиб олиш мумкинми, бу номаълум. Хусусан, саммитда Европа Иттифоқининг Россия нефти нархини пасайтириш таклифини маъқуллаши даргумон. Трамп кетишидан олдин ҳам АҚШ бу чорага қарши экани хабар қилинган эди.
Канада Бош вазирининг айтишича, Канада Украинага 2 миллиард доллар ҳарбий ёрдам, шунингдек, 2,3 миллиард доллар кредит ажратади. Шунингдек, у Россияга қарши санкциялар рўйхати кенгайтирилишини маълум қилди. Британия аллақачон санкцияларни кенгайтирди. Бугун АҚШ ёки Европа Иттифоқи томонидан янги санкциялар кутилмайди.
Эслатиб ўтамиз, аввалроқ “Катта еттилик” давлатларининг Молия вазирлари Россияга босимни кучайтиришга тайёр эканини билдирганди.
