Зеленский ҳам Алиевга телефон қилди

Бугун, 28 декабрь куни Украина Президенти Владимир Зеленский Озарбайжон Президенти Илҳом Алиевга қўнғироқ қилиб, J2-8243 рейсида юз берган авиаҳалокат муносабати билан ҳамдардлик билдирди. Бу ҳақда Зеленский ўзининг Telegram саҳифасида маълум қилди.

“Ушбу фожиа Озарбайжон халқи учун катта йўқотиш бўлди. Биз самолёт учувчилари ва бутун экипажнинг жасоратини алоҳида таъкидладик”, деб ёзган Зеленский.

Украина раҳбарининг сўзларига кўра, ҳозирги асосий устувор масала – бу ҳодиса юзасидан барча саволларга жавоб топиш имконини берадиган батафсил ва холис тергов ўтказиш. Россия ҳалокатга оид барча маълумотларни очиқ ҳолда тақдим этиши ва нотўғри ахборот тарқатишни тўхтатиши шарт. Фото ва видео материалларда самолёт фюзеляжидаги тешиклар ва зарарланишлар яққол кўринади. Улар ҳаво ҳужумидан мудофаа тизими ракетаси зарбасига ўхшаш.

“Биз Озарбайжонни ушбу мураккаб вазиятда барча зарур воситалар билан қўллаб-қувватлаймиз ва бошқа давлатларни ҳам ёрдам кўрсатишга чақирамиз. Шу билан бирга, биз яқин келажакда икки томонлама алоқаларни кучайтириш ҳақида келишиб олдик”, дейди Украина Президенти.

Эслатиб ўтамиз, аввалроқ Россия Президенти Владимир Путин Илҳом Алиевга қўнғироқ қилиб, Озарбайжон ҳаво йўллари йўловчи самолёти билан боғлиқ фожиали воқеа Россия ҳаво ҳудудида содир бўлгани учун узр сўраган эди.

Embraer 190 самолётининг қулаши

25 декабрь куни Azerbaijan Airlines авиакомпаниясининг Баку-Грозний йўналишидаги самолёти ҳалокатга учради. Самолётда 62 нафар йўловчи ва беш нафар экипаж аъзоси бўлган. Самолёт қулашида 38 киши ҳалок бўлди, 29 киши омон қолди. Дастлаб самолётнинг ҳалокатига қушлар галаси билан тўқнашиб кетгани сабаб бўлгани айтилган эди. Кейинроқ “Euronews” Озарбайжон ҳукуматидаги манбаларига таяниб, ушбу авиаҳалокат Россия томонидан учирилган ер-ҳаво синфидаги ракета туфайли содир бўлганини эълон қилди. Шунингдек, AZAL Embraer 190 самолёти ҳалокатининг дастлабки сабаби сифатида ташқи жисмоний ва техник таъсирларни кўрсатди.

Озарбайжоннинг Рақамли ривожланиш ва транспорт вазири Рашод Набиев ҳам самолёт ҳалокатига “ташқи аралашув” сабаб бўлган бўлиши мумкинлигини айтди. АҚШ ҳам лайнернинг қулашида Россияниг ҳаво ҳужумидан мудофаа тизимларининг таъсирини таъкидламоқда. Озарбайжон парламенти депутати Расим Мусабеков Россия томони Azerbaijan Airlines фуқаролик самолётини ҳаво ҳужумидан мудофаа ракетаси билан уриб туширгани учун узр сўраши кераклигини айтди. Россия Президенти матбуот котиби Дмитрий Песков эса Кремль ҳалокатга баҳо беришни тергов якунларига қадар нотўғри деб билишини ва вазиятга изоҳ бермаслигини билдирди.  

Чеченистон ҳукумати эса Рамзан Қодировнинг топшириғи билан Баку-Грозний йўналишидаги AZAL авиакомпаниясига тегишли самолёт ҳалокати оқибатида вафот этган ва жабрланганларнинг оилаларига молиявий ва бошқа ёрдам кўрсатишга тайёр эканини билдирди. Лекин, Озарбайжон Президенти Илҳом Алиевнинг маъмурияти ҳеч қандай ёрдамга муҳтож эмаслигини ва бундай ёрдамни қабул қилмаслигини маълум қилди.