Юлия Рисюкова Президент Администрациясига ўтди

Ўзбекистон Республикаси Президенти Администрацияси раҳбарининг фармойиши билан Юлия Васильевна Рисюкова Ўзбекистон Республикаси Президенти Администрацияси раҳбарининг таълимни ислоҳ қилиш бўйича ўринбосари бўлинмасининг лойиҳа координатори лавозимига тайинланди. Бу ҳақда Президент матбуот котиби Шерзод Асадов маълум қилди.

Янги лавозимга тайинлангани муносабати билан у Таълимни ривожлантириш республика илмий-методик маркази директори лавозимидан озод этилган. Рисюкованинг ўрнига Ўзбекистон Республикаси Президенти Администрацияси раҳбарининг фармойиши билан Шаҳзодбек Каримович Қурбонниёзов Таълимни ривожлантириш республика илмий-методик маркази директори лавозимига тайинланган. 

Эслатиб ўтамиз, аввалроқ Ўзбекистон Республикаси Президентининг тегишли фармони билан Ҳилола Ўктамовна Умарова Ўзбекистон Республикаси Президенти Администрацияси раҳбарининг таълимни ислоҳ қилиш бўйича ўринбосари лавозимидан озод этилган эди, унинг ўрнига Илҳом Тоҳирович Сирожев Ўзбекистон Республикаси Президенти Администрацияси раҳбарининг таълимни ислоҳ қилиш бўйича ўринбосари лавозимига тайинланган.

Бугун, 17 февраль куни Ҳилола Умарова Низомий номидаги Ўзбекистон миллий педагогика университети ректори лавозимига тайинланди.