Европанинг яна бир давлати Фаластинни тан олиши мумкин

Литва Исроил ва ҲАМАС ўртасидаги ўт очишни тўхтатиш ва барча асирларни озод қилиш шарти кучга кириши билан Фаластинни тан олиши мумкин. Бу ҳақда мамлакат Ташқи ишлар вазири Кястутис Будрис журналистларга берган интервьюсида маълум қилди.

Будриснинг сўзларига кўра, Исроил ва ҲАМАС ўртасида сулҳ тузиш ва гаровга олинганларни озод қилиш, шунингдек, минтақада барқарорликка олиб келадиган “йўл харитаси”ни ишлаб чиқиш биринчи навбатдаги вазифа бўлиши керак.

“Бу жараённинг таркибий қисмларидан бири, шубҳасиз, Фаластин давлатининг мавжудлиги бўлиши керак”, деган мамлакат ТИВ раҳбари.

Будриснинг қўшимча қилишича, Литва Франциянинг ташаббуслари ва бошқа давлатларнинг қарорларини диққат билан кузатиб бормоқда.

“Кўпчилик бўлганида ва вақти келганини кўрганимизда, биз албатта Фаластинни тан олиш имкониятини кўриб чиқамиз”, деган Будрис.

Шунингдек, вазир тўғри вақтда ва тўғри шароитда ҳаракат қилиш муҳимлигини таъкидлаган.

“Мен бунга эриша олишимизга ишонаман. Лекин масала шундаки, буни қачон ва қандай шартлар асосида амалга ошириш керак ва бу узоқ вақтдан бери фожиа ёқасида турган вазиятни яхшилашга қандай таъсир қилади”, дея қўшимча қилади ТИВ раҳбари.

Шунингдек, у гаровга олинганлар тақдири ҳақида қайғуриб, уларнинг қанчаси тирик экани номаълумлигини, сулҳнинг бузилиши чуқур хавотир уйғотаётганини ҳам айтиб ўтган.

Эслатиб ўтамиз, жорий йилнинг 9 апрель куни Франция Президенти Эммануэль Макрон “France 5” телеканалига берган интервьюсида Париж яқин ойларда Фаластинни тан олиши мумкинлигини айтганди.

Унинг таъкидлашича, тан олиш масаласи Франция Саудия Арабистони билан биргаликда ташкил этадиган икки давлат қарори бўйича халқаро конференция доирасида муҳокама қилиниши режалаштирилган.

Исроил эса Макроннинг ушбу сўзларини кескин танқид қилган.