Европа Кенгаши ЕИнинг янги раҳбарларини сайлади

Европа Иттифоқи мамлакатлари етакчилари кеча, 27 июнь куни кечқурун Брюсселдаги саммитда иттифоқнинг асосий институтларининг янги раҳбарларига овоз берди. Бу ҳақда “Politico” хабар берди.

Овоз бериш натижасида Урсула фон дер Ляйен Еврокомиссия раиси бўлиб қолади, Европа кенгашига Португалиянинг собиқ бош вазири Антонио Кошта, Европа Иттифоқи ташқи сиёсат хизматига эса Эстония Бош вазири Кая Каллас раҳбарлик қилади.

Уларнинг номзодларини маъқуллаш учун кенгайтирилган малакали кўпчиликнинг қўллаб-қувватлаши зарур эди. Бунга бир вақтнинг ўзида иккита шартни бажариш орқали эришилади: 27 аъзо давлатдан камида 20 таси (72%), Европа Иттифоқи аҳолисининг камида 65 фоизи таклиф учун овоз бериши керак.

Лидерларни танлашнинг нозик мавзуси Украинадаги уруш, Европа Иттифоқи мудофааси ва хавфсизлиги ҳамда Яқин Шарқдаги можаро мавзусини муҳокама қилгандан сўнг кун тартибининг энг қуйи қисмига сурилганлиги сабабли интрига саммитнинг биринчи куни охиригача давом этди.

Бундан олдин Брюсселда Италия Бош вазири Жоржия Мелони номзодларни кўрсатиш жараёнига аралашмаганидан норози экани маълум бўлган эди. Назарий жиҳатдан, у фон дер Ляйен, Кошта ва Калласга қарши овоз бериши мумкин эди, уларнинг номзодлари битта пакетда овозга қўйилган. 

Энди бўлажак лидерлар яна бир тўсиқни енгиб ўтишлари керак: янги Европа парламенти уларнинг номзодларини ва янги Европа комиссарларини тасдиқлаши керак. Европа Иттифоқининг энг йирик сиёсий блоки, 720 ўринли янги парламентда 190 ўринга эга бўлган Европа халқ партияси депутатларининг аксарияти фон дер Ляйенни қўллаб-қувватлаши кутилмоқда. Лекин кўпчилик овозини қўлга киритиши учун унга бошқа партиялар томонидан қўллаб-қувватланиши ва парламент аъзоларининг ярмидан сал кўпроғининг овози керак бўлади.

Янги чақириқ Европа парламентининг биринчи сессияси 16-19 июль кунлари Страсбургда бўлиб ўтади.