Ёлғизлик умрни 6 йилга қисқартириши мумкин – тадқиқот

Ёлғизлик ва ижтимоий изоляция инсоннинг оғир жисмоний ҳамда руҳий хасталикларсиз яшайдиган йиллари сонини сезиларли даражада камайтиради. Бу ҳақдаги тадқиқот “SciTechDaily”да эълон қилинди.

Қайд этилишича, Тюлейн университети олимлари 40 ёшдан 69 ёшгача бўлган деярли 280 минг кишининг маълумотларини таҳлил қилиб чиққан. Тадқиқотчилар ижтимоий алоқаларнинг йўқлиги диабет, юрак хасталиклари, саратон, депрессия ва ташвишланиш бузилишлари ривожланишига қандай таъсир қилишини баҳолаган. Натижалар шуни кўрсатдики, изоляция ва ёлғизлик ҳиссидан азият чекаётган одамлар тўлақонли ҳаёт кечирадиган йилларини йўқотади. 

Тадқиқотга кўра, энг сезиларли зарба руҳий саломатликка тўғри келади. Ёлғизликни бошдан кечираётган эркаклар руҳий бузилишларсиз ижтимоий фаол тенгдошларига қараганда деярли 6 йил камроқ яшайди. Аёлларда бу кўрсаткич пастроқ – 4 йил атрофида. 

Шу билан бирга, оддий ижтимоий изоляция ўрнини тўлдириш мумкин: тўғри овқатланиш, спорт ва соғлом уйқу унинг салбий таъсирини қисман юмшатади. Бироқ чуқур ёлғизлик туйғуси соғлом турмуш тарзига деярли боғлиқ эмас. Иш муаллифлари ёлғиз бўлиш ва ёлғизликни ҳис қилиш ўртасидаги муҳим фарқни таъкидлаган. Инсон ҳамкасблари ёки қариндошлари билан мунтазам мулоқот қилиши, лекин барибир сурункали стрессни келтириб чиқарадиган эмоционал узилишни ҳис қилиши мумкин. Мутахассислар жисмоний машқлар ва диетага қанчалик эътибор қаратилса, муносабатлар сифатига ҳам шунчалик эътибор беришни тавсия қилади.

Эслатиб ўтамиз, аввалроқ олимлар ишқий муносабатлардаги бурилиш нуқталарини аниқлаш учун аниқ математик моделларни қўллагани ҳақида хабар берилган эди.