ЕИга аъзолик Туркия учун энди устувор вазифа эмас – Эрдўған

Туркия Президенти Ражаб Тойиб Эрдўған Европа Иттифоқига аъзо бўлиш Анқара учун эндиликда устувор вазифа эмаслигини маълум қилди. Бу ҳақда у “Al Jazeera” телеканалига берган интервьюсида айтиб ўтди.

Эрдўғаннинг сўзларига кўра, Европа Иттифоқи Туркияни ўз сафига қабул қилишга тайёрлигини кўрсатмаяпти. У, шунингдек, Брюссельнинг бундай ёндашуви оқибатида Европанинг ўзи “ютқазувчи” томонга айланишини таъкидлаган.

У, шунингдек, АҚШ Президенти Дональд Трампдан F-35 қирувчи самолётлари бўйича ваъда олганини ва унга амал қилинишини кутаётганини таъкидлаган.

Маълумот учун, Туркия 1999 йилда Европа Иттифоқига кириш учун номзод мақомини олган эди, бироқ ўшандан бери томонлар ўртасида турли масалалар бўйича бир неча бор келишмовчиликлар юзага келган. Аъзолик бўйича расмий музокаралар 2005 йилда бошланган. 2024 йилда мамлакат Ташқи ишлар вазири Ҳоқон Фидан Туркия ўзини Европа Иттифоқига қабул қилишларини кутиб ўтирмаслигини, балки бошқа “тарихий йўлларни” излашини маълум қилган.

2023 йилнинг май ойида Европарламентдаги етакчи фракция – Европа халқ партияси раҳбари Манфред Вебер Брюссель ва Анқара Туркиянинг Европа Иттифоқига аъзо бўлишини хоҳламаётганини айтиб, музокараларни тўхтатишга чақирган. Кейинчалик Туркия етакчиси Ражаб Тойиб Эрдўған Брюссельдан ҳеч қандай умиди йўқлигини ва унинг Анқарага нисбатан холис эмаслигини таъкидлаган. Унинг сўзларига кўра, Туркия ЕИга берган барча ваъдаларини бажарган, бироқ блокнинг ўзи “ўз ваъдаларидан бирортасини ҳам бажармаган”.