ЕИ Россияга қарши санкцияларни узайтирди 

Европа Иттифоқи кеча, 13 январь куни Россияга қарши иқтисодий санкцияларни яна олти ойга узайтирди. 

“Бугун (Европа Иттифоқи) Кенгаш Россия Федерацияси иқтисодиётининг айрим тармоқларига нисбатан амалдаги чеклов чораларини олти ойга, 2022 йил 31 июлгача узайтиришга қарор қилди”, дейилади ЕИ кенгаши баёнотида. 

Маълумот ўрнида, ўтган йил декабрдаги саммитда ЕИ етакчилари Москва Минск келишувлари бўйича ўз мажбуриятларини бажармагани учун Россияга қарши санкцияларни узайтиришни маъқуллаган эди. Блок 2014 йилдан бери Москвани Украинадаги беқарорлик фаолиятида айблаб, Россиянинг молия, ҳарбий ва энергетика соҳаларига қарши санкциялар жорий қилмоқда.

Кеча, 13 январь куни Венада Россия ва НАТО давлатлари ўртасида ўтказилган музокараларда Европада хавфсизликни таъминлаш ва Москванинг Украина чегарасида қўшин тўплагани кун мавзуси сифатида муҳокама қилинди. Натижада Россиянинг АҚШ ва НАТО билан ўтказган сўнгги музокаралари ҳам мувафаққиятсиз якунланди. 
Ғарб вакиллари Москванинг Украина чегарасидаги хатти-ҳаракатлари ортидан Европа хавфсизлигига таҳдид туғилишидан хавотирда эканини маълум қилган. Россия Украинага ҳужум қиладиган бўлса, уни жиддий оқибатлар кутиб тургани ҳақида огоҳлантирилган. Москва Украинага нисбатан эҳтимолий ҳужумлар ҳақидаги фикрларни инкор қилган ва НАТОни минтақада вазиятни издан чиқарганликда айбламоқда. 

Сўнгги пайтларда Ғарб мамлакатларида, шунингдек, Киевда Россиянинг Украинага бостириб кириши мумкинлиги ҳақида даъволар илгари сурилмоқда. Россия Президентининг Матбуот котиби Дмитрий Песков бундай маълумотни бўш ва асоссиз кескинликнинг кучайиши деб атади. Унинг таъкидлашича, Россия ҳеч кимга таҳдид солмайди. Шу билан бирга, у бундай баёнотларни оқлаш учун провокациялар бўлиши мумкинлигини истисно этмаган ва Украина жануби-шарқидаги инқирозни куч билан ҳал қилишга уринишлар энг оғир оқибатларга олиб келишидан огоҳлантирган.